भूपेश सरकार  ह 30 दिन म लिस ए 15 बड़ फइसला …. विपक्ष ह साधिस निसाना

रायपुर। 17 जनवरी 2019 के भूपेश सरकार के एक माह पूरा होय म  खुद मुख्यमंत्री ह प्रदेस के  जनता के नाम एक पत्र लिख के सबो झन बर आभार जताइस हे।  उहें विपक्ष सरकार के एक माह पूरा होय म  कटाक्ष करत हे।. छत्तीसगढ़ म 15 साल बाद सत्ता म लउटे कांग्रेस पार्टी के सरकार ह 30 दिन म 15 बड़ फइसला कर सबो झन ल बताए के कोसिस करे हे के वो  ह कतका गति ले चलइया सरकार हे।

कांग्रेस सरकार ल राज्य म आए आज एक महीना हो चुके हे। ए 30 दिन म राज्य के मुखिया भूपेश बघेल ह 15 ले अधिक जनहित के फइसला ले हे। कांग्रेस के घोसना पत्र म राज्य के किसान बर सबले बड़ राहत करजा माफी रहिस हे, जेखर सरकार बनात ही सीएम ह पूरा करिस हे। अइसे ही सीएम ह समृद्ध छत्तीसगढ़ के निरमान म नरवा, गरूवा, घुरूवा अउ बाड़ी के महत्व के उल्लेख करत हुए क्षेत्र म सिंचाई बेवस्था, पसुधन विकास अउ किसान मन के हित म ले गे करजामाफी के निरनय लिस। छत्तीसगढ़ देस के पहिली राज्य बनिस जिहां किसान मन ले  25 सौ रुपिया क्विंटल समर्थन मूल्य म धान के खरीदी के निरदेस देय गेहे।  वन अधिकार अधिनियम के तहत् 13 दिसम्बर 2005 के पहिली ले वन भूमि म काबिज अउ तीन पीढ़ी ले रहइया लोगन ल वन भूमि के पट्टा देये के निरनय लेय गिस हे।

श्री बघेल ह सपथ ग्रहन के लगभग 21 दिन बाद अउ उंखर अध्यक्षता म केबिनेट के बइठक म निरनय ले के सिरिफ 12 दिन बाद राज्य सरकार ह किसान मन ल उंखर लगभग 4 हजार 4 सौ एकड़ भूमि वापिस देय के प्रक्रिया निर्धारित कर विधिवत आदेस जारी कर दिस। ए जमीन लगभग एक दशक पहिली इहां टाटा के वृहद इस्पात संयंत्र बर अधिग्रहित करेगे रहिस हे। उंहे तेन्दूपत्ता संग्रहन के दर 4 हजार रु मानक बोरा, बस्तर— सरगुजा  प्राधिकरन के अध्यक्ष स्थानीय विधायक मन ल बनाए के घोसना, छोटे भू—खण्ड के खरीदी बिक्री, झीरम घटना अउ नान घोटाला के जांच अउ जिला खनिज संस्थान न्यास म के समीक्षा, महाविद्यालय मन म  सहायक प्राध्यापक मन के भर्ती के आदेस ले राज्य के हित म निरनय ले गिस हे।

 चिटफंड कंपनी म उपर कार्यवाही के निरदेस, सरकारी खर्चा म कटउती अउ पत्रकार सुरक्षा कानून के प्रक्रिया के निरदेस देके सरकार के रुख साफ करिन हे। अब आघू ए देखना हे के सक्रियता के एक महीना के बाद सरकार निरनय ले म अतना  ही चुस्त रहही या नइ।

 भूपेश सरकार के संविधान उपर विस्वास नइए

 उहें विपक्षीय दल सरकार के महज 30 दिन पूरे होय म कटाक्ष करे ले  नइ चूकत हे।  भाजपा प्रवक्ता संजय श्रीवास्तव के कहिना हे के भूपेश सरकार आधी रात के फउसला लेवत हे।  मानों ए आधी रात के सरकार हे।  एखर अलावा कई फइसला नियम के खेलाफ घलो जाके ले गेहे । एखर ले लगत हे के सरकार के संविधान उपर विस्वास नइए।

विपक्षीय दल चाहे कुछु कहय, मगर ए सौ फीसदी सच हे के छत्तीसगढ़ के जनता ह कांग्रेस ल सरकार चलाए के मउका देय हे। अइसन म कांग्रेस के सरकार जनता के विस्वास म कतना खरा उतरथे , ए जनता जनार्दन ही तय करही। बहरहाल भूपेश सरकार के एक माह पूरा होय म जतना कार्य होइस हे लोगन के उम्मीद घलो उतना ही बढ़े हे।