विधानसभा परिसर म नवनिर्वाचित विधायक मन के स्वागत के तइयारी सुरू

सभागार व कार्यालय मन के नवीनीकरन अउ आवश्यक मरम्मत कार्य जारी

रायपुर। छत्तीसगढ़ म विधानसभा चुनाइ के बाद विधानसभा परिसर म तइयारी सुरू होगे हे।  नवनिर्वाचित सदस्य मन के आए के पहिली भवन समेत सभागार अउ कार्यालय मन ल रंग रोगन कर सजाय जात हे।  कुछु जगह मन के टाइल्स बदले जाच हे। उहें गार्डनिंग के बेवस्था ल घलोक दुरूस्त करे जात हे।  मंत्रिमंडल समेत  अन्य सदस्य मन बर कक्ष मन ल नवां सिरा ले नवीनीकरन के कार्य कराय जात हे।

विधानसभा सचिव चंद्रशेखर गंगराड़े  ह बताइस के कुछु अइसे  नवनिर्वाचित विधायक घलोक होही जे मन पहिली बेर चुन के आही। उमन ल  विधानसभा ले संबंधित साहित्य उपलब्ध कराय जाही।   जेखर  ले उमन  ल विधानसभा के गतिविधि मन ल समझे म परेसानी न होवय। वइसे त सबो सदस्य मन ल ए उपलब्ध कराय  जाथे। मंत्रिमंडल गठन के बाद जब उद्बोधन कार्यक्रम होथे। ओ   दउरान विधानसभा के नवनिर्वाचित सदस्य मन ल इहां के कार्य प्रक्रिया के बारे म अवगत कराय जाथे।  विधानसभा सचिव गंगराड़े ह बताइस के विधानसभा सचिवालय म पंचम विधानसभा के गठन होना हे।  एखर पूर्व विधानसभा परिसर म नवीनीकरन अउ आवस्यक मरम्मत कार्य कराए। नवनिर्वाचित विधायक मन  के स्वागत के तइयारी चलत हे।