साहब मन ह मोर घर चोरी कर ले हे….. सियान महिला ह थाना म लगाइस गुहार

बिलासपुर। ‘सरकारी अफसर मन ह  मोरा घर ल चोरी कर लिस हे।  ये बात कहत हुए एक महिला ह पुलिस ले अपन चोरी हुए घर ल ढूंढे के गुहार लगाइस हे।  बिलासपुर के 60  साल के  महिला के मुताबिक कुछु समय पहिली प्रधानमंत्री आवास योजना  म  ओला घर आवंटित होय रहिस हे। जेखर बर  उमन ह कुछु किश्त घलो जमा कर देय रहिस हे।  लेकिन आज तक  उमन ल  घर नइ मिले हे। जेखर चलत मोला मिट्टी के कच्चा घर म रहिना पड़त हे।

महिला ह बताइस के,  मैं जे घर म रहत हव,  वो ह कई जगह ले गिर गेहे।  जेखर सेती काफी परेसान हव।  उहें गांव के सरपंच ह बताइस के,  सियान महिला ह उमन ल घर के ना मिले के बात बताइस हे।  महिला ह घर बर 80 हजार रुपिया घलो जमा करा देय हे।  लेकिन अब तक ओला घर नइ मिले हे।

उमन बताइन के जब जबावदार अफसर मन ले ए बारे म बात करने त उमन ह गोल-मोल बात बोलके मामला ल टाल दिस हे।  जेखर सेती हमन पुलिस के तीर एखर सिकायत लेके आए हन। उहें महिला के कहना हे के ‘सरकारी अफसर मन ह  मोरा घर ल चोरी कर लिस हे।  मैं आवंटित हुए घर के दू किश्तें घलो भर देय हव।  लेकिन अब तक मोला घर नइ मिलिस।  मैं मिट्टी के घर म रहत रहे हव, जे ह  अब ढह गेहे।  मोर  तीर अब रहे  बर कोनो ठिकाना नइए।