Corona: प्रदेश म पिछिले 24 घंटा म मिले हे 2688 नवा मरीज, पढो पूरा खबर
जय जोहार…. प्रदेश म बीते 24 घंटा म कोरोना (Corona) के 2688 नवा मरीज के पहचान होय हे। उहचे 713 मरीज मन ल बने होय के बाद अस्पताल ले डिस्चार्ज कर दे गे हे। जबकि इलाज के दौरान 7 संक्रमित मन के मौत हो गे हे।
सनिच्चर के जन कोरोना (Corona) के नवा मरीज मिले हे, ओमा रायपुर ले 328, जांजगीर-चांपा ले 268, कोरबा ले 257, रायगढ़ ले 209, बिलासपुर ले 148, राजनांदगांव ले 138, दुर्ग अऊ कांकेर ले 112-112, बलौदाबाजार ले 96, धमतरी ले 94, बीजापुर ले 93, कोंडागांव ले 72, महासमुंद ले 70 अऊ कबीरधाम ले 67 मरीज शामिल हे।
बता दन कि प्रदेश म कोरोना (Corona) संक्रमित मन के संख्या ह बाढ़ के 140258 हो गे हे। जेमा ले 27369 एक्टिव मामला हे। उहचे 111654 लोगन मन ह कोरोना ल मात दे दे हे, जेखर बाद ओ मन ल अस्पताल ले डिस्चार्ज कर दे गे हे। ए वायरस ले प्रदेश म 1235 लोगन मन के मौत हो गे हे।
