नदिया म खोज-खोज के धर डरिन 300 सांप, हाथ अउ गला म लपेट के पहुंचिन मंदिर

समस्तीपुर। बिहार के समस्तीपुर के विभूतिपुर म सावन के महीना म एक उत्सव मनाए जाथे।

लोगन मन नदिया म पानी के भीतर ले सांप खोज-खोज के धरथें अउ देवी मंदिर म लानके पूजा करथें।

यहू दरी सावन के पहिली सोमवार के दिन बूढ़ी गंडक नदी म करीब 25 झन आदमी मन पानी म बूड़-बूड़के 300 ले ज्यादा सांप पकड़िन। ओकर बाद भगवती मंदिर ले जाके उंकर पूजा करिन।

लोगन मन ये सांप मन ला हाथ अउ गला म लपेट के आइन। उंकर पाछू-पाछू सब श्रद्धालुमन चलत रिहिन।

विभूतिपुर के सिंघिया घाट पश्चिमी के पंचवटी चौक म भगवती मंदिर हे, जिहां हर साल नागपंचमी ले पहिली ये पूजा होथे।

एकर बर लोगन मन हर साल नदी ले सांप पकड़ के लानथें। ये पूजा म आसपास के गांव के लोगन मन घलो बड़ संख्या म आथें।