रायपुर। मख्यमंत्री रमन सिंह ह सनिवार के पंचायत अउ ग्रामीण विकास विभाग के ग्राम स्वराज अभियान के समापन समारोह म सामिल होइस। डॉ. सिंह ह ये दउरान कहिन कि महिला मन कोनो ले पीछु नइए। उमन कहिन कि अब हालत अइसे हे कि जब हमार दाई दीदी मन संझा के टोपी पहिन के डंडा अउ सीटी लेके निकलथे तो गांव व शहर के गुंडामन सराब कोटिया मन ओमन ल देख के भाग जाथे। अइसे हे हमार राज्य के महिला मन । डॉ। सिंह स्व। कुंवरबाई के नाम म इनाम के भी ऐलान करिस हे। जेमा सबले बढ़िया काम करइया स्व सहायता समूह ल ये इनाम दे जाही।
समारोह म सामिल लोगन मन ल संबोधित करत हुए सीएम रमन सिंह ह कहिन कि अब हमार सरकार महिला मन के संग हे। अउ पूरा परयास करे जाही कि उंखर बेहतरी बर कुछु सरकार करय। उमन कहिन कि अब महिला मन म गजब के आत्मविस्वास आगे हे। एक ठन किस्सा सुनात हुए कहिन कि जब मैं ई-रिक्सा म बैठे अउ पूछे कि का आपन ट्रेनिंग लेके लाइसेंस बनवाय हव। तब चालक महिला ह बड़े आत्मविस्वास के संग जबाव दिस कि ट्रेनिंग भी लेव हव अउ लाइसेंस घलो हे। अब अपन परिवार के भरण-पोषण करे बर तय्यार हव। अइसे हे छत्तीसगढ़ के महिलामन के आत्मविस्वास। सरदार बलबीर सिंह जुनेजा इंडोर स्टेडियम म आयोजित कार्यक्रम म पंचायत एवं ग्रामीण विकास मंत्री अजय चन्द्राकर, किरीसी एवं पसुपालन मंत्री बृजमोहन अग्रवाल, लोक निर्माण मंत्री राजेश मूणत, मुख्य सचिव अजय सिंह, धरसींवा विधायक देवजी भाई पटेल, महापौर प्रमोद दुबे, विधायक सत्यनारायण सरमा, धनेन्द्र साहू, श्रीचंद सुंदरानी, विधायक नवीन मारकंडेय अउ जिला पंचायत अध्यक्ष शारदा देवी मवजूद रहिन हे।
