स्कूल ड्रेस छुपा के रखइया संकुल समन्वयक हरिशकंर साहू निलंबित

बलौदा बाजार । विकास खंड बिलाईगढ़ के प्राथमिक शाला कैथा म स्कूल ड्रेस छुपा के रखइया पूर्व संकुल समन्वयक हरिशंकर साहू  ल आज जिला शिक्षा अधिकारी बलौदा बाजार  ह  निलंबित कर दिस।

आप मन ल बतादन के  पाछू के बुधवार म दू पिकअप  स्कूली लइका मन के ड्रेस कही ले जाय जात रहिस हे।  जेला नायब तहसीदार ह पकड़ के बीईओ के सुपुर्द  करिस हे।  मिले जानकारी म विकासखंड मुख्यालय बिलाईगढ़ के अंतर्गत प्राथमिक शाला कैथा ले पाछू बुधवार के दू पिकअप वाहन म 8800 नग स्कूल ड्रेस के अवैध परिवहन करत हुए तहसीलदार अश्वनी चंद्रा ह पकड़िस। अउ एला विकास खंड शिक्षा अधिकारी बिलाईगढ़ के  सउपिस। इहीं संबंग म  आवश्यक कार्यवाही  बर  जिला शिक्षा अधिकारी बलौदाबाजार एके भार्गव  ह आज बिलाईगढ़ पहुंचिन।

भार्गव ह बताइस के सरकारी योजना  म गरीब लइका मन ल बांटे बर स्कूल ड्रेस आय रहि सहे।  जेला गरीब लइका मन ल ना बांट के जानबूझकर छुपा के रखे गिस। ए बड़े दुर्भाग्य हे। उमन आघू बताइन के पूर्व संकुल समन्वयक हरि शंकर साहू  ह स्कूल ड्रेस ल छुपा के रखे रहिस हे अउ एखर जानकारी कोनो  भी उच्चाधिकारी मन ल नइ दीस हे, अउ ना ही बीईओ ल बताइश ।  सारा दोष उमन अपन ऊपर ले लिस हे एखर सेती ओला निलंबित कर देय गिस हे।