भाजपा ए 7 कार्यक्रम मन के माध्यम ले जनता ले करही सोझे संपर्क

रायपुर। बीजेपी ह लोकसभा चुनाव के तइयारी सुरू कर दे हे। एला लेके पार्टी के केंद्रीय नेतृत्व ह 7 कार्यक्रम तय करे हे। ए कार्यक्रम मन ले जनता ले सोझे संपर्क करही। एखर संगेच लोगन ल पार्टी के विचारधारा ले जोड़ही। ए कार्यक्रम मन ल लेके बीजेपी प्रदेस प्रभारी अनिल जैन ह पार्टी पदाधिकारी मन के संग बइठक करिन। उमन बताइन के,  ए कार्यक्रम मन ले समाज के सबो वर्ग मन ल जोड़े जाही। ए कार्यकर्म मन म केंद्रीय मंत्री घलो सामिल रहही।

लोकसभा चुनाव ल  लेके होवत ए कार्यक्रम म बुद्धिजीवी सम्मेलन, युवा संसद, कमल ज्योति अभियान, मोटर साइकिल रइली, लाभार्थी संपर्क योजना, मेरा परिवार भाजपा परिवार अउ समर्पण दिवस जइसे आयोजन करे जाही। ए आयोजन मन बर अनिल जैन ह 11 लोकसभा प्रभारी ल एखर जवाबदारी देहे। एखर संग ही क्लस्टर अउ कार्यक्रम प्रभारी सहित तमाम लोगन ल घलो अलग अलग कार्यक्रम मन के जवाबदारी दे गेहे।

राजनाथ सिंह अउ रघुवर दास रहही मवजूद

आगामी 11 फरवरी के पंडित दीनदयाल उपाध्याय के पुण्यतिथि म भाजपा नमो एप के माध्यम ले कार्यकर्ता मन ले 5 रुपिया लेके 1000 रुपिया  तक के समरन लेही। ए  मउका म केंद्रीय मंत्री राजनाथ सिंह अउ झारखंड के मुख्यमंत्री रघुवर दास घलो उपस्थित रहही।