काबर…हाईकोर्ट चीफ जस्टिस ह पूछिस…ए SIT केती ले आए हे  ?

नान घोटाला मामला म SIT म हाईकोर्ट ह उठाइस सवाल, राज्य सरकार ले मांगिस जवाब

रायपुर : छत्तीसगढ़ बीजेपी के नेता प्रतिपक्ष धरमलाल कौशिक ह नान घोटाला मामला म SIT के कार्रवाई म रोक लगाइया जनहित याचिका म हाईकोर्ट चीफ जस्टिस के डिवीजन बैंच म दूनों पक्ष मन के बीच तकरीबन एक घण्टे तक बहस होइस।

दूनों पक्ष मन के बहस के बाद हाईकोर्ट चीफ जस्टिस ह राज्य शासन द्वारा गठित करे गे SIT उपर सवाल उठात हुए बार – बार पूछिस के ए SIT केती ले आए हे ? कउन कानून ले एला इहां स्थापित करे गेहे? कोनस कानून के मुताबिक हे ये ? एखर जवाब राज्य शासन नइ दे सकिस।

जवाब प्रस्तुत करे बर 22 फरवरी तक शासन ह हाईकोर्ट ले समय मांगिस हे।  अंतरिम आदेस देवत हुए हाईकोर्ट ह कहिस के 1 मार्च तक अइसन कोनो कार्रवाई SIT नइ करही  जेमा कोनो ल दिक्कत होवय।  SIT ल यथास्थिति रखत हुए न तो कोनो ल पकड़े जाए अउ ना ही कोनो ल  छोड़े जाए।  मामला म अब अआघू  के सुनवाई 1 मार्च के होही।

बता दन छत्तीसगढ़ म कांग्रेस के सरकार बने के बाद कुछु ही दिन मन म सीएम भूपेश बघेल ह प्रदेस म भाजपा शासन काल के बेरा होए बहुचर्चित घोटाला मन ल लेके एक के बाद एक SIT टीम के गठन कर जांच कराए के फइसला लेय। एणा मुख्य रूप ले बहुचर्चित नान घोटाला जेमा कई हजार करोड़ के घोटाला होय रहिस हे । एखर संगे-संग झीरम घाटी हत्याकांड अउ अंतागढ़ टेपकांड घलो सामिल हे।

एखर अलावा अइसन कई बड़का मामला हे जेमा भूपेश सरकार SIT गठित कर जांच करवाए के मन बनावत हे।  इहीं ल लेके नेता प्रतिपक्ष धरमलाल कौशिक ह हाईकोर्ट म जनहित याचिका दायर कर SIT के कार्रवाई म रोक लगाए के मांग करे हवय।