दुर्ग लोकसभा सीट म फंसिस पेंच, बीजेपी-कांग्रेस बीच हो ही ‘नाक’ के लड़ाई

रायपुर. दुर्ग लोकसभा सीट ल लेके दूनो पार्टी म पेंच फंस गे हे. भाजपा अउ कांग्रेस दूनों ही पार्टी प्रत्याशी मन के सूची जारी करे ल ले के उहापोह की स्थिति म. दूनों पार्टी एक-दूसर के ओर ‘पहिली आप’ के मुद्रा म हे. एक तरफ कांग्रेस प्रत्याशी मन के फइसला नई ले पात हे., उहें दूसर कोती भाजपा म प्रत्याशी मन ल ले के अभु कोनो सुगबुगाहट नइए. दूनों ही पार्टी म प्रत्याशी मन के लंबा कतार हे.

अगर भाजपा म टिकट के दावेदार मन क बात करे जाए त पूर्व मंत्री प्रेम प्रकाश पाण्डेय, पूर्व मंत्री रमशीला साहू, पूर्व संसदीय सचिव विजय बघेल, वरिष्ठ नेता प्रीतपाल बेलचंदन जइसे नाम मन के चर्चा हे. भाजपा म प्रत्याशी मन के लिस्ट लंबा होए के वजह हे, पाछू के विधानसभा चुनाव म करेगे वादा. भाजपा ह कई लोग मन ल विधानसभा चुनाव के दउरान लोकसभा म चांस देय जाए के बात कहत हुए टिकट काट देय रिहिस हे. अइसे म भाजपा के अंदरखाना म सबले जियाद खलबली मचे हुए हे.

कांग्रेस गलो कमोबेस स्थिति इही हे. कांग्रेस म गलो पूर्व विधायक प्रतिमा चंद्राकर, सीएम भूपेश बधेल के खास माने जावइया राजेंद्र साहू, मंत्री ताम्रध्वज साहू के सुपुत्र जितेंद साहू के नाम मन के चर्चा जोरों म हे. इहां घलो प्रतिमा चंद्राकर ल लोकसभा टिकट देय के बात कह विधानसभा चुनाव के दउरान टिकट काटे गे रिहिस हे.

बहरहाल देखना हो ही के, दूनों राष्ट्रीय पार्टी मन म पहिली प्रत्याशी के लिस्ट कउन जारी करत हे. संगेच ये घलो देखना दिलचस्प हो ही के, दूनों ही पार्टी मन म कखर उपर भरोसा जतात हे. जेखर टिकट ए बेर फेर कटत हे, उंखर विरोध ल कइसे शांत करे जाही. दूनों ही पार्टी मन बर दुर्ग के दू लोकसभा सीट नाक के लड़ाई बनगे हे. दुर्ग लोकसभा सीट पाछू चुनाव म कांग्रेस के झोली म गे रिहिस हे. अइसे म कांग्रेस कोनो गलती नई करना चाही. उहें दूसर ओर भाजपा पाछू चुनाव म मिले हार लेसबक लेते हुए आघू के रननीति तइयार करत हे.