चाय के खेती म बनत हे जशपुर जिला के पहिचान, दार्जिंलिंग के चाय ले घलो बेहतर हे इहां के चाय ह

जशपुरनगर.  राज्य म चाय की खेती ले अब धीरे-धीरे जशपुर जिला के पहिचान बनत हे। इहां के चायपत्ती ल विशेषज्ञ मन ह दार्जिंलिंग के चाय ले बेहतर क्वालिटी के बतात हे। जशपुर जिला म 11 एकड़ म चाय बागान तियार करे गे हे। ये बागान ले रोज दू कुंटल चायपत्ती टूटथे, जेखर प्रोसेसिंग करे के बाद 40 किलो चाय तियार होथे। जशपुर प्रवास म आए रिहिन महिला अउ बाल विकास, समाज कल्याण मंत्री व जशपुर जिला के परभारी मंत्री अनिला भेड़िया ह  शुक्रवार के बिहनिया सारूडीह चाय बागान पहुंचिन।  उहां चाय के खेती के अवलोकन करिस हे। ये मौका म ओहर चाय के पत्ती ले ग्रीन-टी अउ काली सामान्य चाय के निरमान के बारे म जनकारी लिन हे। जिला प्रशासन द्वारा जशपुर जिला म चाय के खेती बर करे गे परयास के सराहना करिन अउ ये अभिनव परयास बर अधिकारी मन ल बधई दिस हे। उंहे भेड़िया ह सारूडीह महिला स्व.सहायता समूह के महिला सदस्य मन ले मिलिस अउ चाय के खेती, पौधा के देखरेख अउ पत्ती तोड़ाई के संग ओखर ले चाय निरमान के बारे म चर्चा करिन हे। जशपुर जिले म चाय के सफल खेती ल देखत ऐला बढ़ावा दे बर जोर देवत कहिन कि चाय के खेती ले जशपुर जिला के पहिचान बने, एखर बर शासन ले हरसंभव मदद करे के परयास करहूं।

वनमण्डलाधिकारी कृष्ण जाधव ह बतइन कि जशपुर के नजदीक म बालाछापर म प्रोसेसिंग यूनिट के स्थापना करे के काम ह लगभग पूरा हो गे हे। अभी जिला के केसरा मनोरा म 30 एकड़ अउ गुटरी, लोखण्डी म 20 एकड़ म चाय बागान लगाए बर विभाग ह तियारी करत हे। फिलहाल चाय के 3 लाख पौधा बालाछापर नर्सरी म तैयार हे, जेमा ले 2 लाख पौधा ल ऐ साल लगाए बर तियारी कर ले गे हे। इही मौका म सारूडीह चाय बागान के पत्ती ले बने चाय के पाकिट समूह के महिला मन ह प्रभारी मंत्री भेड़िया अउ अन्य जनप्रतिनिधि ल भेंट करिस हे।