आरक्षक ह उतारिस पत्नी ल मउत के घाट फेर अपन आप ल मार लिस गोली
गरियाबंद. जिला मुख्यालय म बुधवार के मिश्रा कॉलोनी म जिला बल के एक जवान ह अपन पत्नी ल गोली मारके मउत के घाट उतार दिस, ओखर बाद वो ह खुद अपन आप ल गोली मार के आत्महत्या कर लिन।
बतात हंवय कि मृतक आरक्षक रमेश सेन हरे। रमेश के गार्ड ड्यूटी लगे रिहिस, फेर संझा कन जब रमेश ह ड्यूटी म नई दिखीस त ओखर खोजबीन शुरू करिन। इही दउरान छानबीन करत उंखर घर पहुंचिस त घर के कपाट ह अंदर ले बंद मिलीस। बिहनिया के ड्यूटी करके वो घर गे रहीस, फेर संझा तक वो ह नई अईस। आरक्षक के कुछ सगा मन पहुंचिन तेखर बाद घर के कपाट ल तोड़के भीतर देखिन त आरक्षक के पत्नी के लाश ह बिस्तर ऊपर पड़े रहीस अउ आरक्षक रमेश के लाश ह जमीन म औंधे मुंह पड़े मिलीस।
एडिशनल एसपी सुखनंदन राठौर ह बतईन कि पहिली नजर म अईसे मालूम होवत हंवय कि पत्नी के पीठ ऊपर सुते हालात म वोला गोली मारे गे हे। उंहे रमेश ह खुद अपन छाती म गोली मारे हे। दूनो झन के शव ल पोस्टमार्टम बर भेज दे गे हे। पुलिस ह मामला के जांच म जुटिन हे।
