लइका मन ला पढ़ाए ला छोड़के शराब पीके बाजार के छपरी तरी लूडो खेलत रिहिस प्रधानपाठक
जशपुरनगर। लइका मन ला स्कूल म पढ़ाए ला छोड़के मनोरा ब्लाक के प्राइमरी स्कूल भाटापारा के प्रधान पाठक हा स्कूल ले बाहिर गांव के बाजार म छपरी तरी शराबी मन के संग लूडो खेलत मिलिस।
प्रधानपाठक के ए हरकत के वीडियो बनाके गांव के एक युवक हा सोशल मीडिया म वायरल कर दिस। ए वीडियो ला देखके शिक्षा समिति के जिलाध्यक्ष प्रबल प्रताप सिंह जूदेव हा डीईओ से रिपोर्ट मांगे हे।
गांव के नंदकिशोर राम, संतोष राम आदि के आरोप हे कि शिक्षक सोमेश्वर यादव के ये पुराना आदत हे। ओ हा कभू स्कूल म बच्चा मन के क्लास नई लेवय। स्कूल आके बस्ती डाहर शराब पीये बर निकल जाथे अउ दिनभर नशा हालत म बस्ती म घूमत रहिथे।
प्रधानपाठक के खिलाफ ग्राम सभा के बैठक म निंदा प्रस्ताव पारित करके ओला हटाए के मांग करे गे रिहिस, लेकिन तीन महीना होगे शिक्षा विभाग कार्रवाई नई करत हे।
जिला शिक्षा समिति के अध्यक्ष प्रबल प्रताप सिंह जूदेव हा केहे हें कि ये कृत्य हा शिक्षक के आचरण के विरूद्ध हे। शिक्षा विभाग ला अइसे शिक्षक मन के खिलाफ बर्खास्तगी के कार्रवाई करना चाही।
ए मामला म बीईओ बीआर ध्रुव के कहना हे कि शिकायत के बाद घटना के जांच होवत हे, मामला म कार्रवाई करे जाही।
