पुलिस ह करिन नक्सल सहयोगी ल गिरफ्तार, पूछताछ म बड़का खुलासा के उम्मीद

बलरामपुर। सामरी थाना इलाका म पुलिस ह एक नक्सल सहयोगी ल गिरफ्तार करे हे। वो नक्सल सहयोगी ह अपन मोटरसाइकिल म नक्सली मन बर अब्बड़ अकन राशन सामान, दवाई अउ अन्य जरूरत के चीज ले जात रहीस। गिरफ्तार नक्सल सहयोग लालजी ल सामरी थाना इलाका के पुदांग के रहवईया बतात हे। पुलिस ह नक्सली सहयोगी ले पूछताछ करे म जुटिन हे अउ बड़का खुलासा के उम्मीद जतावत हे।

सामरी पुलिस अउ सीआरपीएफ के टीम ह सर्चिंग म निकले रिहिस, इही दउरान सूचना मिलिस कि एक झन मनखे ह अपन मोटरसाइकिल म नक्सली मन बर सामान ले जात हे, ताहन टीम ह घेराबंदी करिस। इही दउरान नक्सल सहयोगी लालजी ह जईसे ही जंगल के तरफ पहुंचिस ताहन पुलिस ल अपन कोती आवत देख भागत रहीस। आरोपी ल भागत देख पुलिस टीम ह अब्बड़ दूर तक ओकर पीछा कर पकड़िन हे।

आरोपी ह पुलिस बतईस कि वो ह नक्सली मन बर दवाई, राशन अउ छाता लेके जावत रहीस। एखर बर नक्सली मन ह 10 हजार रूपिया दे रिहिस। वो ह लगातार नक्सली बर सामान के सप्लाई करत रिहिस अउ अभी सामान खत्म होय के बाद वो ह छग, झारखंड के सरहद म स्थित बूढ़ा पहाड़ म नक्सली बर सामान लेके जात रहीस। पूछताछ म आरोपी ह बतईस कि वो ह नक्सली कमांडर अमन अउ उंखर दस्ता बर सामान ले जात रहीस।

पुलिस ह बतईन कि आरोपी ह ये समान के खरीदी कोनो एक जगह ले नई करे हे अउ कुछ सामान ल राजपुर, शंकरगढ़ त कोनो सामान ल कुसमी ले खरीदे रिहिस।