जनपद सदस्य मन मांगिन सीईओ ले 50 लाख के फंड के हिसाब, फेर होईस जमके बवाल

जशपुर। पत्थलगांव जनपद पंचायत के बईठक म आज सरकारी फंड के हिसाब-किताब ल लेके सीईओ अउ जनपद सदस्य मन के बीच जोरदार बवाल हो गे। बताए जात हे कि मारपीट के नौबत आ गे रिहिस।

बतात हे कि जनपद सदस्य मन जनपद पंचायत क्षेत्र के सशक्तिकरण बर शासन ले आए रिहिस 50 लाख के फंड के सीईओ ले हिसाब मांगिन हे। सीईओ ह 19 लाख रूपिया भर के हिसाब दिस अउ बाकी 31 लाख रूपिया ल कहां खरचा करिस एला बताए ल छोड़ के गोलमोल जवाब दे ल धर लिस। इही बात म बईठक म आए रिहिन सब्बो जनपद सदस्य मन भड़क गे।

हंगामा अतेक बढ़ के कि सीईओ ह जनपद सदस्य मन ले हाथ जोड़कर माफी घलोक मांगिस फेर उंखर मन के आक्रोश ह कम नई होईस। जनपद सदस्य मन सीईओ के हिसाब-किताब ल माने बर तियार नई हे अउ आरोप लगात हे कि सीईओ ह सब्बो योजना म उंखर मन ले कमीशन के मांग करथे। ये मामला म सीईओ ह सब्बो आरोप ल बेबुनियाद बतात हे।