उत्तरप्रदेश म जमीन बताके लोगन मन ल ठगइया अंतर्राज्यीय गिरोह पकड़ाइस, चार आरोपी गिरफ्तार

जय जोहार बिलासपुर…. उत्तरप्रदेश म जमीन ब्रिकी करवाए के नाम म ठगी करइया अंतर्राज्यीय गिरोह के पुलिस ह भंडाफोड़ करिस। पुलिस ह गिरोह के चार आरोपी मन ल गिरफ्तार कर लिस। ऊहचे चार आरोपी फरार हे। जरहाभाठा, बिलासपुर के रहवइया संत बंजारे पिता खल्लराम बंजारे ह 17 फरवरी के थाना सिविल लाइन म रिपोर्ट दर्ज कराए रहिस। एमा उत्तरप्रदेश के सहारनपुर म जमीन बिक्री के नाम म बेमेतरा जिला के ग्राम गर्रा के रह‌वइया महेंद्र बंजारे पिता अमरदास बंजारे के तरफ ले जरहाभाठा, बिलासपुर के रहवइया महेंद्र बंजारे अऊ उत्तरप्रदेश रहवइया जमीन दलाल नौशाद अली, वसीम खान के संग मिलके ठगी करे बर के बात कहिस।

पुलिस अधीक्षक प्रशांत अग्रवाल ह मामला म आरोपी मन के जल्द गिरफ्तारी बर निर्देशित करिस। जेखर चलत एएसपी शहर ओपी शर्मा अऊ सीएसपी सिविल लाइन आरएन यादव के मार्गदर्शन म थाना प्रभारी परिवेश तिवारी अऊ सिविल लाइन पुलिस उपनिरीक्षक मोहन भारद्वाज ल जांच सौंपिस। मुखबिर ले सूचना मिलिस कि मुख्य आरोपी झनेंद्र महिलांग कोनो दूसर ल ठगे बर उत्तराखंड के रहवइया मोहम्मद आजाद के संग जरहाभाठा म अपन किराए के मकान म आए हे।

मऊका म पुलिस टीम ह पहुंचके झनेंद्र महिलांग के संग महेंद्र बंजारे अऊ गोरेलाल बंजारे घलो मिलिस। सबो ल थाना म पूछताछ म संतु बंजारे ले 43,00,000 रूपिया ठगी करे के पुष्टि होइस। जेमा महेंद्र बंजारे अऊ उत्तरप्रदेश के रहवइया नौशाद खान, वसीम खान के अलावा अन्य लोग मन के संलिप्तता सामने आइस।

पुलिस ह मामला म आरोपी बिलासपुर के रहवइया झनेंद्र महिलांग, हरिद्वार, उत्तराखंड के रहवइया मोहम्मद आजाद, ग्राम गर्रा, बेमेतरा के रहवइया महेंद्र बंजारे अऊ बिल्हा के रहवइया गोरेलाल जांगड़े ल गिरफ्तार कर लिस।