थाना म थाना प्रभारी के खिलाफ शिकायत ल ले के जनाक्रोश , व्यापारी संघ घलो करत हे शिकायत के विरोध

जय जोहार रायपुर…. अइसे पहिली बार होय होही जब कोनो थाना प्रभारी के खिलाफ ओखरे थाना म शिकायत दर्ज करे गिस , पूरा मामला आय चौकी ले थाना बने खम्हारडीह थाना के , कुछ दिन पहिली गायत्री नगर के स्टील सिटी कालोनीवासी मन के फोन के आधार म कुछ युवती मन ल थाना लाय गे रिहिस अऊ ऊंखर उपर १५१ के तहत मामला बनाय गे रिहिस लेकिन दुसर दिन एक न्यूज़ पोर्टल म युवती मन के खिलाफ आपत्ति जनक खबर देख के युवती मन प्रेस कांफ्रेंस कर के उक्त न्यूज़ पोर्टल के पत्रकार उपर कार्यवाही के बात कहिन ,

पत्रकार उपर कार्यवाही के बात ले अऊ मीडिया कर्मी मन थाना जा के थाना प्रभारी उपर ये आरोप लगाईन कि आपे मन युवती मन ल पत्रकार उपर कार्ववाही करे बर उकसावत हो , ये मामला ल ले के मीडियाकर्मी मन गृहमंत्री अऊ पुलिस अधीक्षक ले घलो मिल के आगे , मंत्री अऊ एसपी साहब ह थाना प्रभारी उपर जांच बईठा दिस , जांच ल ले के थाना क्षेत्र के रहवासी अऊ व्यापारी संघ ह नाराजगी व्यक्त करे हे अऊ कहे हे कि थाना प्रभारी ममता शर्मा अली ह कोरोना काल म लगातार गश्त करत हे अऊ मनखे मन के समस्या ल सुलझात हे , अइसे म ऊंखर उपर जांच बईठाना उचित नई हे,

जांच के विरोध करैय्या मन म विधायक कुलदीप जुनेजा , जोन अध्यक्ष प्रमोद मिश्रा ,पार्षद रोहित साहू ,पूर्व पार्षद राकेश धोत्रे समेत अवन्ती विहार के सब्बो व्यापारी मन शामिल हे , इन्हा बताना लाजिमी होही कि उक्त युवती मन प्रेस कांफ्रेंस के दौरान किहिन कि हमन ल मैडम ह किहिस कि अगर आप मन ल लगत हे कि कोई पत्रकार आप मन के छबी धूमिल करे के प्रयास करत हे त आप मन ओखर उपर कोर्ट म मानहानि के दावा कर सकथो.