जय जोहार…. (chhattisgarh) सीएम भूपेश बघेल ह खरीफ फसल के सुरक्षा अउ पशु ल वरसा ऋतु म होवईया गलघोटू अउ एकटंगिया बीमारी ले बचाय बर अवइया एक जुलाई ले प्रदेस म रोका छेका अभियान ल सुरु करे के निर्देस देहे। सुराजी गांव योजना के तहत गांव म निर्मित सत-प्रतिसत गौठान ल क्रियाशील बनाय बर गौठान समिति के गठन अउ गौठान म चारागाह बर सुरक्षित भूमि म ए बछर अनिवार्य रूप ले चारागाह विकसित करे के घलो निर्देस देहे।
सीएम भूपेश बघेल ह आज अपन निवास कार्यालय म गोधन न्याय योजना के तहत पशुपालक, गोबर विक्रेता, गौठान समिति अउ महिला स्व-सहायता समूह ल रासि अंतरण के कारीकरम ल सम्बोधित करत रिहीन। ए मउका म (chhattisgarh) मुख्यमंत्री बघेल ह एक जून ले 15 जून तक गौठान म क्रय करे गोबर के रासि समेत गौठान समिति अउ स्व-सहायता समूह ल लाभांस के रूप म कुल 7 करोड़ 80 लाख रुपिया के रासि ल ऑनलाइन भुगतान करीन ।
(chhattisgarh) ए कारीकरम म कृषि अउ जल संसाधन मंत्री रविन्द्र चौबे, वन मंत्री मोहम्मद अकबर, स्कूल शिक्षा मंत्री डॉ. प्रेमसाय सिंह टेकाम, नगरीय प्रशासन मंत्री डॉ. शिव कुमार डहरिया, लोक स्वास्थ्य यांत्रिकी मंत्री गुरू रूद्रकुमार, उद्योग मंत्री कवासी लखमा, महिला अउ बाल विकास मंत्री श्रीमती अनिला भेंडिया अउ राजस्व मंत्री जयसिंह अग्रवाल, मुख्य सचिव अमिताभ जैन, अपर मुख्य सचिव सुब्रत साहू उपस्थित रिहीन।
