जय जोहार….(Raipur) मुख्यमंत्री भूपेश बघेल ह आज राजधानी रईपुर के खालसा स्कूल म गुरुनानक जयंती के अवसर म प्रकास तिहार म सामिल होइन हे। सीएम बघेल ह प्रदेस वासी मन ल गुरू नानक जयंती के बधाई अउ सुभकामना दीन। मुख्यमंत्री बघेल ह गुरु ग्रंथ साहब के सामने मत्था ल टेका अउ प्रदेस के सुख, समृद्धि अउ खुसहाली के कामना करीन।
ए अवसर म मुख्यमंत्री बघेल ह किहीन कि गुरूनानक देव जी के प्राकट्य उत्सव देस -दुनिया म श्रद्धा अउ उल्लास के संग मनाय जात हे। (Raipur) वो हा किहीन कि गुरुनानक देव जी ह मानवता के सेवा के संदेस दीन। वो हा सेवा ल सबले बड़का धर्म बताइन।
कोरोना संकटकाल म सिक्ख समाज डहार ले मानवता के सेवा के करे उत्कृष्ट काम के उल्लेख करत हुये मुख्यमंत्री बघेल ह किहीन कि सिक्ख समाज ह छत्तीसगढ़ के संग पूरा देस म सेवा के अनुकरणीय उदाहरण प्रस्तुत करीन। (Raipur) ये समाज के मनखे मन के गुरु के प्रति अटूट आस्था के प्रतीक हे। सीएम बघेल ह किहीन कि गुरुनानक देव ह देस के अइसे बिरले सन्त म सामिल हे, जे मन ह सबले जादा यात्रा करीन।
