जय जोहार। (chhattisgarh) मुख्यमंत्री भूपेश बघेल ह किहीन कि नक्सल समस्या के समाधान बर राज्य सरकार विश्वास, विकास अउ सुरक्षा के रणनीति म काम करत हे। अधिकारी एखर बर योजना के मैदानी स्तर म बेहतर क्रियान्वयन ल सुनिश्चित करे अउ जादा ले जादा हितग्राही मन ल योजना अउ कारीकरम के लाभ ल दिलाये। वो हा किहीन कि अधिकारी सुरक्षा के संग विकास काम ल गति दे के काम घलो करे।
मुख्यमंत्री ह आज सुकमा म जिला अधिकारी मन के संग आयोजित बइठक ल सम्बोधित करत रिहीन। मुख्यमंत्री भेंट-मुलाकात के दउरान कोंटा विधानसभा के भ्रमण के बाद काली संझा सुकमा पहुंचे रिहीन । मुख्यमंत्री भूपेश बघेल ह अधिकारी मन ले किहीन कि सुकमा अंचल म मनखे मन के आय म वृद्धि करे म बिसेस धियान दे के जरूरत हे । वो हा किहीन कि जिला के युवा मन के लिस्टिंग कर ओमन ल स्वरोजगार बर प्रेरित करे। सासन के आने आने योजना के लाभ ल देके युवक मन ल रोजगार ले जोड़े के परयास करे।
