Raipur : सीएम ह करीन किसान के हित म बड़का घोसना: समर्थन मूल्य म करे जाही हरेक एकड़ 20 क्विंटल धान के खरीदी
जय जोहार । (Raipur ) मुख्यमंत्री भूपेश बघेल ह गुरुवार के विधानसभा म किसान के हित म बड़का घोसना करीन। वोहा किहीन कि अब हरेक एकड़ 20 क्विंटल धान के समर्थन मूल्य म खरीदी करे जाही। मुख्यमंत्री ह छत्तीसगढ़ विधानसभा म विनियोग विधेयक म चर्चा के जवाब देत हुए ये घोसना करीन । विधानसभा म चर्चा के बाद विनियोग विधेयक 2023 ल पारित कर दे गीन ।
मुख्यमंत्री ह किहीन कि हमर मन के सरकार बनत ही हमन ह किसान के ऋण माफी करीन , राजीव गांधी किसान न्याय योजना ले किसान ल ससक्त बनावत हन। ओमन ल इनपुट सब्सिडी के लाभ घलो देवत हन । समर्थन मूल्य म हरेक एकड़ धान के खरीदी ल 15 क्विंटल ले बढ़ाके 20 क्विंटल करे ल जावत हन। । मेहा भेंट-मुलाकात म जिहां घलो गए रहेव, किसान के एक ठन ही मांग रिहीन , समर्थन मूल्य म हरेक एकड़ 20 क्विंटल धान के खरीदी करे जाए। मुख्यमंत्री भूपेश बघेल ह किहीन कि एक अप्रैल ले आवासहीन, उज्ज्वला गैस योजना अउ शौचालय के हितग्राही के सर्वे कराए जाही। आवास योजना म जतना घलो पात्र हितग्राही होही , ओमन ल क्रमबद्ध रूप ले आवास दे जाही ।
मुख्यमंत्री ह विनियोग विधेयक म चर्चा के जवाब देत हुए किहीन कि कोनो राज्य के अर्थव्यवस्था के आकार जीएसडीपी ले निर्धारित होत हे । छत्तीसगढ़ के जीएसडीपी बछर 2018 म 03 लाख 27 हजार 106 करोड़ रिहीन , जेन 2023 म बढ़के 05 लाख 09 हजार 43 करोड़ अनुमानित हे । मार्च 2020 ले सरलग 02 बछर तक कोविड-19 आपदा के सेती आर्थिक गतिविधि मंद होए के बावजूद राज्य सासन के नीति के सेती अर्थव्यवस्था के आकार 56 प्रतिशत के वृद्धि होए हे । राज्य के जीएसडीपी म वृद्धि बछर 2022-23 म 8 प्रतिशत अनुमानित, जेन अखिल भारतीय जीडीपी के अनुमानित वृद्धि दर 7 प्रतिशत ले जादा ।
