Raipur : गंभीर बीमारी के इलाज बर मिलत हे 20 लाख रुपिया तक के सहायता
जय जोहार। (Raipur) छत्तीसगढ़ सरकार डहार ले गंभीर बीमारी के इलाज बर देस के बड़का स्वास्थ्य योजना म ले एक ठन योजना ल संचालित करे जावत हे। मुख्यमंत्री विशेष स्वास्थ्य सहायता योजना ले अब तक 2643 मरीज ल सहायता दे गेहे। ए योजना म मरीज ल इलाज बर 20 लाख रुपिया तक के सहायता दे जावत हे।
मुख्यमंत्री विशेष सहायता योजना म गंभीर बीमारी जइसे कैंसर, थैलेसीमिया मेजर, हीमोफिलिया, फेफड़ा, किडनी अउ लीवर ट्रांसप्लांट, कॉक्लीयर इम्प्लांट, हृदय, मस्तिष्क अउ मेरूदंड संबंधित जटिल ऑपरेशन बर राज्य के भीतर अउ राज्य के बाहर इलाज बर आर्थिक सहायता दे जात हे। ये योजना ल 1 जनवरी 2020 ले संचालित करे जावत हे ।
कोंडागांव जिला के केशकाल म रहवइया इमरान आडवाणी के घर जब दिशान ह जन्म लीन त खुशी के माहौल रिहीस। लेकिन जब दिशान चार माह के होइन अचानक ओखर तबियत खराब हो गीन । चिकित्सकीय जांच म पता चलीन कि ओला थैलेसीमिया मेजर नामक गंभीर आनुवांशिक बीमारी हे । खून के कमी के सेती दिशान के शरीर सरलग कमजोर होत जावत रिहीस।
बैंगलोर के चिकित्सक ह बोनमैरो इम्प्लांट के सलाह दीन। एमा 40 लाख रुपिया के खर्च होए के बात जानके परिजन ह दिशान ल बचा पाए के अपन उम्मीद घलो खो दे रिहीस। अइसे घड़ी म मुख्यमंत्री विशेष स्वास्थ्य योजना ह दिशान के जिनगी म आशा के एक ठन किरण बनके सामने आईन। परिवार के आवेदन करे के 15 दिवस के भीतर स्वास्थ्य विभाग डहार ले 18 लाख के रकम दिशान के पिता के खाता म अंतरित कर दे गीन । बैंगलोर के एक निजी अस्पताल म ओखर इलाज प्रारंभ होइन । 6 महीना के उपचार के बाद दिशान ह थैलेसीमिया मेजर नामक आनुवांशिक बीमारी ल हरा दीन। दिशान के स्वस्थ होए म ओखर परिजन बड़ अकन खुश हे ।
