रायपुर : मुख्यमंत्री भूपेश बघेल ह कबीर जयंती के दिन बधाई, जयंती म घोषित करे गे हे शुष्क दिवस
मुख्यमंत्री भूपेश बघेल ह 4 जून के संत कबीर के जयंती बर प्रदेशवासी मन ल बधाई दे हे। अपन बधाई संदेस म ओमन कहिन कि संत कबीर के जीवन दर्शन ह सदैव प्रासंगिक हे। संत कबीर ह दोहा मन के माध्यम ले प्रेम, सद्भावना अऊ सामाजिक समानता के संदेस दे हे। ओमन समाज म फैले आडंबर अऊ जात-पात के सख्त विरोध करे रिहिन। दोहा के माध्यम ले ओमन सामाजिक कुरीति मन उपर घलो कठोर प्रहार करे रिहिन। लोगन मन ल सत्य, अहिंसा, दया, करूणा अऊ परोपकार जईसे मानवीय मूल्य मन ल अपनाए के प्रेरणा दे रिहिन। छत्तीसगढ़ म घलो संत कबीर के जीवनदर्शन के इहां के जन-जीवन म गहरा प्रभाव हाबे। सीएम कहिन कि संत कबीर के उपदेश हमन ल सत्य के रास्ता दिखात रही।
ए कोती राज्य शासन डाहर ले 4 जून 2023 म कबीर जयंती के अवसर म ए दिन ल शुष्क दिवस घोषित करे हे। एखर बर शराब दुकान ल बंद रखे के निर्देश दे गे हे। वाणिज्यिक कर (आबकारी) विभाग मंत्रालय महानदी भवन कोती ले जारी आदेश म कहे गे हे कि शुष्क दिवस के दौरान प्रदेश म समस्त देशी अऊ विदेशी मदिरा के फुटकर दुकान अऊ होटल बार व क्लब मन ल बंद रखे जाए। संगे-संग दुकान, होटल, रेस्टोरेंट, क्लब मन म मदिरा बेचे अऊ परोसे के अनुमति नई होवय।
