राज्यसभा सांसद रंजीत रंजन के हुंकार कहिन बड़ सुघ्घर बुता करत हे छत्तीसगढ़ के भूपेश सरकार, जम्मो वर्ग के लोगन मन हे खुश

राज्यसभा सांसद रंजीत रंजन ह लाल बहादुर शास्त्री हॉस्पिटल म 11 करोड़ के बुता के करिन भूमिपूजन

छत्तीसगढ़ ले कांग्रेस के राज्यसभा सांसद रंजीत रंजन आज दुर्ग जिला के दौरा म रहिन जिहां ओमन कांग्रेस के जिला स्तरीय कार्यकर्ता अऊ जनप्रतिनिधि मन ले मुलाकात करिन। ए बेरा म आज के समय के राजनीतिक हालात उपर गोठबात के संगे संग ओमन मोदी सरकार उपर जमके हमला बोलिन।

छत्तीसगढ़ म राष्ट्रीय नेता मन के चुनावी दौरा ह सुरू हो गे हे। विकास कार्य मन के भूमिपूजन अऊ लोकार्पण के बुता घलो तेज हो गे हे। ए बछर चुनावी बछर आए अईसे में कांग्रेस ह दोबारा सत्ता म वापसी करे बर दुर्ग के संभागीय सम्मेलन के बाद अब राज्यसभा के सांसद कार्यकर्ता मन के संबोधन करवात हे इही कड़ी म राज्यसभा सांसद रंजीत रंजन दुर्ग पहुंचिन।  

सांसद ह कहिन कि छत्तीसगढ़ के सरकार ह बड़ सुघ्घर बुता करत हे। भूपेश बघेल के राज म जम्मो वर्ग खुश हे अऊ जतेक योजना अऊ सरकार के प्लैगशिप योजना चलत हे ओ ह प्रशंसनीय हे। हमन हाल म कर्नाटक अऊ हिमाचल के चुनाव ल जीते हन। ओमन कहिन कि मध्यप्रदेश म घलो हमन पांच गारंटी योजना लागू करईया हन त छत्तीसगढ़ म अवरईया चुनाव म बेहतर मेनिफेस्टो तैयार करबो।