रायपुर. रायपुर के वीआईपी रोड (VIP Road Politics) के नांव बदले के फईसला ले अब राजनीति बयानबाजी के दउर सुरू हो गे हे। बता देन कि MIC के बईठका म वीआईपी रोड के नाव ल बदलके स्वर्गीय राजीव गांधी कर दे गे हे। एला लेके पूर्व मंत्री अजय चंद्राकर ह कांग्रेस उपर निसाना साधे हे। ओमन कहिन कि नांव म का रखे हे जनता जानथे कि एखर निर्माण ल काखर कोती ले कराए गे हे। ए ह ओछी मानसिकता के राजनीति आए। अजय चंद्राकर ह गांधी परिवार ल लेके घलो कांग्रेस उपर निसाना साधे हे। कहिन कि कांग्रेस तीर बताए बर कुछु नई हे तेखर सती बने बनाए संस्थान मन के नांव ल बदलत हे। कांग्रेस ह एक परिवार ले आगू कभू बढ़ नई सके। ए परिवार ले बाहिर निकलही त मानसिक विकलांग हो जाहि। कांग्रेस के मेनिफेस्टो गांधी ले सुरू हो के गांधी म खतम होथे।
विधानसभा के मानसून सत्र ल लेके पूर्व मंत्री अजय चंद्राकर ह कहिन कि 4 दिन के मानसून सत्र राखे गे हे एखर मतलब ही हे कि सरकार तीरन कोनों दृष्टिकोण नई हे। ए ह दृष्टिकोण विहीन सरकार आए। ए जनता के सामना करे बर तियार नई हे। सरकार कोनों बजट सत्र ल पूरा दिन नई चला पाईस। सरकार म नैतिक ताकत नई हे विधानसभा के सामना करे के।
कांग्रेस के प्रशिक्षण शिविर ल लेके घलो अजय चंद्राकर ह तंज कसत कहिन कि जेन स्टार्टअप के उदिम सुरू करे गे हे ओखर संबंध म जम्मो जानकारी देना चाही। दू नंबर म दारू कईसे बेचे जाथे… नसा के व्यापार कईसे होथे… धान के तस्करी कईसे होथे.. बांध के पानी ल कईसे बहाए जाथे… ए जेन नवा स्टार्टअप प्रदेश म सुरु होए हे ओखर संबंध म घलो कांग्रेस म प्रशिक्षण जरूर देना चाही। भाग्य के सिक्का बार-बार नई टूटे। 15 बछर म भले हमर ले नाराजगी रहे होही अऊ ओमन चुनाव जीते हे हमन हारे नई हन।
जम्मो प्रदेश म सरकार ह जर्जर दीवार ल तोड़ के कमर्शियल कंपलेक्स बनाही ए मुद्दा ल लेके अजय चंद्राकर ह कहिन कि एखर पहिली घलो जमीन बेचे बर विज्ञापन होए हे। ए कोनों नवा बात तो नोहे। एक लाख करोड़ के कर्जा ले गे हे। ओमा नांव कुछु अऊ हे अऊ बुता कुछु अऊ रही। हमन त पूछईया हन कि आप मन करजा ल काबर ले हो। धान म किसान ल बांधे बर ले गे हे। अब चुनाव मुंड म खड़े हे त नवा-नवा गोठ करके कुछु बुता होने वाला नई हे।
No Comment! Be the first one.