महतारी वंदन योजना ले प्रदेश के दाई-बहिनी मन ला मिलत हे आर्थिक सहारा”

रायपुर. राज्य सरकार डहर ले चलाए जा वाला महतारी वंदन योजना प्रदेश भर के महिला मन बर आर्थिक मजबूती के एक बड़े माध्यम बन के उभरत हे। ए योजना के तहत पात्र दाई-बहिनी मन ला हर महीना एक हजार रुपया के सहायता रासि दिए जावत हे, जेकर ले ओमन अपन रोज के जरूरत मन ला पूरा करे बर आत्मनिर्भर बनत हें।

प्रदेश के अलग-अलग जिला मन ले ए योजना के सुग्घर परिणाम आघू आवत हे। बलौदाबाजार-भाटापारा जिला के ग्राम परसाभदेर के रहइया चारबाई निषाद घलो ए योजना ले लाभ पवइया महिला मन मा सामिल हे। कम आमदनी वाले परिवार के होय के सेती ओकर बर घर के खरचा चलाना बड़ मुस्किल रिहिस, फेर अब महतारी वंदन योजना ले मिलइया रासि ह ओकर परिवार बर एक बड़े सहारा बन गे हे।

चारबाई ह बताथे कि ए आर्थिक मदद ले ओला घर के खरचा अउ जरूरी सामान बिसाए मा बड़ सुविधा मिलत हे। अब ओला छोटे-छोटे जरूरत बर दूसर ऊपर निर्भर नइ रहे बर पड़य। ए योजना ह न केवल ओकर आर्थिक स्थिति ला मजबूत करत हे, बल्कि ओकर आत्मविश्वास ला घलो बढ़ावत हे।

महतारी वंदन योजना के माध्यम ले राज्य सरकार ह महिला मन ला आर्थिक रूप ले सक्षम बनाए अउ ओमन के जिनगी के स्तर मा सुधार लाय बर लगातार कोसिस करत हे। योजना के लाभ उठा के प्रदेश के लाखों महिला मन अपन परिवार के आर्थिक मजबूती मा बड़ योगदान देवत हें।