मुख्यमंत्री विष्णुदेव साय ह सक्ती हादसा में मरे वाला मन के परिवार ला 5-5 लाख अउ घायल मन ला 50-50 हजार रुपिया सहायता राशि के घोषणा करिन

कमिश्नर बिलासपुर ला जांच के दीन अदेस

रायपुर. सक्ती जिला के सिंघीतराई में स्थित वेदांता पावर प्लांट में होय दुर्घटना ला लेके मुख्यमंत्री विष्णुदेव साय ह गहरा दुख जताय हें। ओमन ए घटना ला बहुते दुखद अउ पीरादायक बतावत हादसा में अपन मनखे मन ला खोय वाला परिवार मन बर अपन गहरा संवेदना प्रकट करिन।

मुख्यमंत्री श्री साय ह कहिन कि ए मुस्किल बखत में राज्य सरकार ह प्रभावित परिवार मन के संग पूरी संवेदनशीलता अउ मजबूती के साथ खड़ा हे। ओमन मृतक श्रमिक मन के परिवार ला 5-5 लाख रुपिया के सहायता राशि देय के घोषणा करे हें। संग ही, हादसा में घायल होय श्रमिक मन ला 50-50 हजार रुपिया के अरथिक सहायता दिय जाही, ताकि ओमन ला तुरते राहत अउ सहारा मिल सके।

मुख्यमंत्री ह अधिकारी मन ला निर्देश दीन हें कि जम्मो घायल मन के बने ले अउ मुफत में इलाज के बेवस्था करे जाय। ओमन घायल मन के जल्दी नीक होय के कामना करत कहिन कि इलाज में कोनो भी किसम के लापरवाही बरदास्त नहीं करे जाही।

मुख्यमंत्री श्री साय ह घटना के गंभीरता ला देखत हुए कमिश्नर बिलासपुर ला जांच के अदेस दे दे हें। ओमन साफ कहिन कि ए हादसा बर जेकर घलो दोस मिलही, ओखर खिलाफ कड़ा ले कड़ा कारवाही करे जाही।

मुख्यमंत्री ह कहिन कि राज्य सरकार ह पूरा मामला ऊपर लगातार नजर रखे हे अउ राहत संग पुनर्वास के काम ला पहिली प्राथमिकता दे के चलाय जावत हे। ओमन अधिकारी मन ला निर्देश दीन हें कि प्रभावित परिवार मन ला जतेक हो सके, ओतकी मदद पहुंचाय जाय।