वेदांता पावर प्लांट हादसा ऊपर उद्योग मंत्री ह जताइन गहरा सोक
रायपुर. वाणिज्ज, उद्योग अउ सार्वजनिक उपक्रम मंत्री लखनलाल देवांगन ह सक्ती जिला के डभरा ब्लॉक के ग्राम सिंघीतराई में स्थित वेदांता लिमिटेड के पावर प्लांट में बॉयलर फटे ले होय दुर्घटना अउ ओमा होय जान-माल के नुकसान ऊपर गहरा सोक जताय हें।
मंत्री श्री देवांगन ह ए घटना ला बहुते दुखद अउ पीरादायक बतावत मृतक मन ला सरधांजली दीन अउ सोक में डूबे परिवार मन बर अपन गहरा संवेदना प्रकट करिन। ओमन कहिन कि ए हादसा में मनखे मन के मउत अउ कतको झन के घायल होय के खबर ह मन ला बहुते सुस्त (व्यथित) कर दे हे। ओमन भगवान ले दिवंगत आत्मा मन के सांति अउ परिवार मन ला ए दुक्ख ला सहे के सकति देय के पराथना करिन।
उद्योग मंत्री ह बताइन कि घटना के जानकारी मिलत ही कलेक्टर अउ पुलिस अधीक्षक ले फोन में गोठ-बात करके जिला प्रशासन ला तुरते मउका में पहुंच के राहत अउ बचाव के काम सुरू करे के निर्देश दे दे गे रहिस। अभी के बखत में प्रशासन के देख-रेख में तेजी ले राहत के काम चलत हे अउ घायल मन ला तुरते अउ बने डाक्टरी सुविधा दियाय जावत हे।
ओमन अधिकारी मन ला निर्देश दीन हें कि जम्मो घायल मन के इलाज में कोनो किसम के कमी झन होवय अउ जरूरत के हिसाब ले बने ले बने इलाज के सुविधा तय करे जाय। संग ही, ओमन घायल मन के जल्दी नीक होय के कामना करिन।
मंत्री श्री देवांगन ह साफ कहिन कि ए घटना के गहिर अउ निसपच्छ जांच कराय जाही। ओमन कहिन कि जांच में जेकर घलो दोस मिलही, ओखर खिलाफ श्रम कानून के तहत कड़ा ले कड़ा कारवाही करे जाही, ताकि आगू के बखत में अइसन घटना मन दोबारा झन होवय।
