“सहकार ले समृद्धि” के संकल्प ला पूरा करे बर ऐतिहासिक कदम साबित होहीं नवा बने पैक्स (PAX): मुख्यमंत्री श्री साय

• मुख्यमंत्री ह प्रदेश मा नवा बने 515 प्राथमिक कृषि साख सहकारी समिति मन के करिन वर्चुअल सुभारंभ
• प्रदेश मा अब सहकारी समिति मन के संख्या बढ़के हो गे हे 2 हजार 573
• किसान मन ला अब असानी ले मिलही खाद, बीज अउ कम समय बर करजा (अल्पकालीन ऋण) के सुविधा

रायपुर. मुख्यमंत्री विष्णुदेव साय ह आज नवा रायपुर के मंत्रालय महानदी भवन ले प्रदेश मा नवा बने 515 प्राथमिक कृषि साख सहकारी समिति (पैक्स) मन के वर्चुअल सुभारंभ करिन। ओमन एला प्रदेश के किसान मन बर एक बड़े सौगात बतावत कहिन कि “सहकार ले समृद्धि” के संकल्प ला पूरा करे के डाहर मा ये कदम ह ऐतिहासिक आय।

मुख्यमंत्री ह कहिन कि ये नवा समिति मन के सुरू होय ले अब पूरा प्रदेश मा सहकारी समिति मन के संख्या बढ़के 2 हजार 573 हो गे हे। ओमन प्रदेश के अन्नदाता किसान मन ला बधाई अउ सुभकामना देवत कहिन कि सरकार ह खेती-किसानी मा आज के नवा तकनीक अउ सहकारिता के माध्यम ले नवा-नवा प्रयोग ला बढ़ावा देवत हे, जेखर से गांव अउ किसान मन समृद्ध बन सकें। ओमन बताइन कि अब पैक्स समिति मन ह ‘बहुउद्देश्यीय सोसायटी’ के रूप मा काम करही, जेखर से किसान मन ला खाद, बीजन अउ कम समय बर करजा (अल्पकालीन ऋण) कस सुविधा मन ओखर गांव के तीर मा ही मिल जाही। संग मा धान बेचे के काम घलो असान हो जाही अउ किसान भाई मन अपन तीर-तखार के समिति मा ही धान ला बेच सकहीं।

मुख्यमंत्री ह कहिन कि प्रदेश मा पहिली ले काम करत 2058 समिति मन ला अउ बढ़िया सुविधा दे बर कंप्यूटरीकृत (Computerized) करे गे हे अउ इहाँ माइक्रो एटीएम घलो लगाय गे हे, जेखर ले किसान मन 20 हजार रूपया तक के पइसा निकाल सकहीं। ओमन ये जानकारी घलो दीन कि नवा बने 515 समिति मन मा ले 197 समिति ह आदिवासी इलाका मा बनाय गे हे, जेखर ले दूर-दराज के किसान भाई मन ला सीधा फायदा मिलही। ओमन कहिन कि ये समिति मन ह सिरिफ़ खाद-बीजन बांटे तक सीमित नई रहहीं, बल्कि आघू चलके दूध उत्पादन, मछरी पालन कस खेती-किसानी ले जुड़े दूसर काम मन ले घलो जुड़ही।

संग मा, समिति मन मा लोक सेवा केंद्र घलो सुरू करे जाही, जिहाँ एक ही जगह मा 25 ले जादा सरकारी सुविधा मन मिलही। मुख्यमंत्री ह किसान मन ले बिनती करिन कि ओमन ये समिति मन के सदस्य बन के एखर जादा ले जादा लाभ उठावं अउ एला चलाय मा अपन सक्रिय भागीदारी निभायं।

ये मउका मा सहकारिता मंत्री केदार कश्यप ह वर्चुअल माध्यम ले सामिल रीहिन। संग मा कृषि मंत्री रामविचार नेताम, स्वास्थ्य मंत्री श्याम बिहारी जायसवाल, उद्योग मंत्री लखनलाल देवांगन, शिक्षा मंत्री गजेंद्र यादव, पर्यटन मंत्री राजेश अग्रवाल, रोजगार एवं कौशल विकास मंत्री गुरु खुशवंत साहेब, अपेक्स बैंक के प्राधिकृत अधिकारी केदारनाथ गुप्ता, मुख्यमंत्री के सचिव राहुल भगत अउ सचिव सहकारिता सी.आर. प्रसन्ना, सहकारिता विभाग के प्रबंध संचालक के.एन. कांडे के संग अलग-अलग जिला मन ले लगभग 2500 जनप्रतिनिधि, किसान भाई अउ अधिकारी मन उपस्थित रीहिन।