राष्ट्रीय कृषि विकास योजना ले फायदा: ग्राफ्टेड टमाटर के खेती ले दुबेलाल के बढ़िस मुनाफा

रायपुर. परदेस के किसान मन सरकार के योजना के लाभ लेके अऊ खेती-किसानी के नवा तकनीक अपनाके अपन आमदनी ला बढ़ावत हें। अइसने महासमुन्द जिला के ग्राम बम्बुरडीह के किसान दुबेलाल कोसरे ह आधुनिक कृषि तकनीक ला अपनाके बड़े सफलता पाय हवय। श्री कोसरे ह बताइन कि पहिली ओ मन पारंपरिक ढंग ले धान अऊ दूसर फसल बोय करंय। ओमा खरचा (लागत) जादा होय के बाद घलो फायदा कम मिलय, जेखर ले घर के आर्थिक स्थिति बढ़िया नई रहिस।

बछर 2025-26 मा उद्यानिकी विभाग कोति ले ओ मन ला जानकारी मिलिस कि उद्यानिकी फसल ले कम जगह मा जादा पैदावार अऊ जादा मुनाफा कमाए जा सकत हे। ये गोठ ले प्रेरित होकर ओ मन राष्ट्रीय कृषि विकास योजना के तहत ‘ग्राफ्टेड टमाटर सीडलिंग प्रदर्शन’ घटक के लाभ लीन। श्री कोसरे ह बताइन कि योजना मा ओ मन ला 30 हजार रुपया के अनुदान घलो मिलिस, जेखर ले ओ मन अपन 0.40 हेक्टेयर सिंचित खेत मा नवा तकनीक ले ग्राफ्टेड टमाटर के खेती सुरू करिन।

किसान दुबेलाल ह बढ़िया क्वालिटी के ग्राफ्टेड पौधा, सिंचाई बर ड्रिप सिस्टम अऊ खरपतवार ला रोके बर मल्चिंग तकनीक के उपयोग करिस। ओ मन बताइन कि उन्नत तकनीक ले ओ मन ला प्रति एकड़ लगभग 16 ले 18 टन तक पैदावार मिलिस। बजार मा टमाटर के औसत भाव 20 रुपया किलो मिले ले ओ मन ला कुल लगभग 3 लाख 9 हजार रुपया के लाभ होइस। ये लाभ ह धान के खेती के तुलना मा कतको गुना जादा रहिस, जेखर ले ओखर घर के स्थिति मा बड़े सुधार आइस। दुबेलाल ह अब दूसर किसान मन ला घलो बजार के मांग के हिसाब ले खेती करे बर सिखावत हे। ओखर देख-देख मा अब गाँव के अउ दूसर किसान मन घलो उद्यानिकी फसल अऊ आधुनिक खेती कोति खिंचात हें।