कृषि मंत्री ह राज्य के 3556 बीज उत्पादक किसान मन ल 8.2 करोड़ रूपए प्रोत्साहन राशि के करिन अंतरण
बीज उत्पादन म आत्मनिर्भरता बर एकजुट होके काम करे के जरूरत: कृषि मंत्री रामविचार नेताम
रायपुर. कृषि विकास अउ किसान कल्याण मंत्री रामविचार नेताम ह आज नवा रायपुर म छत्तीसगढ़ राज्य बीज अउ कृषि विकास निगम कोति ले आयोजित कार्यक्रम म प्रदेश के 3556 बीज उत्पादक किसान मन ल वित्तीय बछर 2024-25 के 8 करोड़ 01 लाख 97 हजार रूपए के प्रोत्साहन राशि डीबीटी (DBT) के माध्यम ले सीधा ओखर खाता म ऑनलाईन भेजिन। ए राशि मंडी निधि के तहत हितग्राही ल दे गे हे। ए मउका म प्रदेश के सैकड़ों किसान प्रक्रिया केंद्र मन ले वीडियों कॉन्फ्रेंसिंग के माध्यम ले जुड़े रिहिन। मंत्री श्री नेताम ह बीज उत्पादक किसान मन ले गोठ-बात करके बढ़िया बीज उत्पादन बर ओखर उत्साह बढ़ाइन, संग म निगम के एक बछर के उपलब्धि म आधारित किताब के विमोचन घलो करिन। कार्यक्रम म कृषि उत्पादन आयुक्त शहला निगार बिसेस रूप ले उपस्थित रिहिन।
कृषि मंत्री रामविचार नेताम ह कार्यक्रम ल संबोधित करत कहिन कि किसान मन ह गजब मेहनत अउ परिश्रम ले बीज उत्पादन करे हें। ओखर ए मेहनत के फल ओमन ल मिलय, एही मकसद ले प्रोत्साहन के राशि सीधा ओखर खाता म भेजे गे हे। ओमन किसान मन ल धान के अलावा दलहन-तिलहन, मिलेट्स अउ सब्जी-भाजी जइसन दूसर आय देवे वाली फसल लेवे के अपील करिन। ओमन कहिन कि गरमी के दिन म धान के खेती ले बचना चाही, काबर कि एकर म पानी जादा लगथे। हमन ल पर्यावरण ल संतुलित बनाए रखे बर घलो धियान देवे के जरूरत हे। ओमन कहिन कि धान के जगह किसान मन ल दलहन-तिलहन के खेती करना चाही, एकर ले माटी के ताकत (उर्वरा शक्ति) बने रहिथे अउ पानी के खरचा घलो कम होथे।
मंत्री श्री नेताम ह कहिन कि बीज के गुणवत्ता म सरकार के साख जुड़े रहिथे। ओमन बीज उत्पादक किसान मन ल ईमानदारी के संग बढ़िया बीज उत्पादन करे के अपील करिन। ओमन किसान मन ले कहिन कि प्रदेश ह किसान मन के लगन अउ मेहनत ले बीज उत्पादन के क्षेत्र म आत्मनिर्भर बनही। सरकार के संकल्प किसान मन बर प्राथमिकता म हे। ओमन मिल-जुलकर छत्तीसगढ़ ल कृषि उत्पादक राज्य के रूप म आगू बढ़ाए म जोर दीन।
बीज निगम के अध्यक्ष चन्द्रहास चंद्राकर ह कहिन कि ए गौरव के बिसे ए कि मुख्यमंत्री विष्णु देव साय के अगुवाई अउ मंत्री श्री नेताम के मार्गदर्शन म निगम कोति ले समय म बीज उत्पादक किसान मन ल प्रोत्साहन राशि दे जात हे। आगू घलो कोसिस रहिही कि समय म किसान मन के मेहनत के सम्मान होवय। ओमन कहिन कि हमर सरकार ह किसान मन ले प्रति एकड़ 21 क्विंटल धान 3100 रूपए के भाव ले खरीद के देस म किसान मन के मान बढ़ाए हे।
मंत्री श्री नेताम ह ए मउका म कवर्धा, अंबिकापुर अउ रायपुर जिला के किसान मन ले गोठ-बात करके ओखर हाल-चाल जानिन। किसान मन ह बछर 2024-25 के प्रोत्साहन राशि देवे बर मुख्यमंत्री विष्णु देव साय, मंत्री रामविचार नेताम अउ निगम के अध्यक्ष चंद्रहास चंद्राकर के आभार मानिन।
