नगर पालिका बनही धमधा, उप मुख्यमंत्री अरुण साव ह करिन घोषणा
श्री साव ह धमधा में 7 करोड़ के काम के करिन लोकार्पण-भूमिपूजन
स्कूल शिक्षा मंत्री गजेंद्र यादव अउ सांसद विजय बघेल घलो होइन सामिल
रायपुर. लोकार्पण अउ भूमिपूजन कारयक्रम में दुर्ग जिला के धमधा नगर पंचायत पहुँचे उप मुख्यमंत्री अउ नगरीय प्रशासन एवं विकास मंत्री अरुण साव ह धमधा नगर पंचायत ला नगर पालिका बनाए के घोषणा करिन। धमधा के लोगन मन कतको दिन ले एकर माँग करत रहिन। नगर पालिका बने के बाद सहर ला विकास काम बर अउ जादा पइसा मिलही अउ काम में तेजी आही। मनखे मन के ए जुन्ना माँग ला पूरा करे बर उप मुख्यमंत्री श्री साव के ए घोषणा ले धमधा के सुव्यवस्थित विकास अउ जनसुविधा बढ़ाए के काम ला अउ जादा गति मिलही।
उप मुख्यमंत्री श्री साव ह अपन धमधा दौरा के बखत लगभग 7 करोड़ के विकास काम के लोकार्पण अउ भूमिपूजन करिन। एमा 4 करोड़ 60 लाख रूपिया के काम के लोकार्पण अउ 2 करोड़ 39 लाख रूपिया के काम के भूमिपूजन सामिल हे। ओमन सहर के विकास बर 2 करोड़ रूपिया देय के घलो घोषणा करिन। श्री साव ह बताइन कि पिछले दो साल में धमधा नगर पंचायत के विकास बर 13 करोड़ रूपिया दिय गे हे। परदेस के सबो नगरीय निकाय के विकास बर फुर्ती अउ गंभीरता ले काम करे जावत हे।
ए कारयक्रम में स्कूल शिक्षा मंत्री गजेंद्र यादव, दुर्ग के सांसद विजय बघेल, विधायक डोमनलाल कोर्सेवाड़ा, ईश्वर साहू अउ ललित चन्द्राकर घलो सामिल होइन। तेलघानी विकास बोर्ड के अध्यक्ष जितेन्द्र साहू, धमधा नगर पंचायत के अध्यक्ष श्वेता अग्रवाल, उपाध्यक्ष ब्रिजेन्द्र दानी, जनपद पंचायत के अध्यक्ष लिमन साहू अउ जुन्ना मंत्री जागेश्वर साहू संग सुरेन्द्र कौशिक, जितेन्द्र वर्मा, प्रीतपाल बेलचंदन, पार्षद अउ जनप्रतिनिधि घलो ए दौरान उपस्थित रहिन।
