तेन्दूपत्ता संग्राहक मन ला रोजगार, बीमा, छात्रवृत्ति अउ सामाजिक सुरक्षा के लाभ
रायपुर. वन अउ जलवायु परिवर्तन मंत्री केदार कश्यप के निर्देस के मुताबिक वन विभाग, वन आश्रित परिवार अउ तेन्दूपत्ता संग्राहक मन के सामाजिक अउ आर्थिक विकास बर कतको जन-कल्याणकारी उदिम करत हे।ष “वन हवय त जीवन हवय, तेन्दूपत्ता हवय त रोजगार हवय” के संदेश के संगे-संग वन विभाग अउ लघु वनोपज संघ ग्रामीण अउ वन इलाका म रहइया परिवार मन ला रोजगार, बीमा सुरक्षा, शिक्षा अउ सामाजिक सहायता देवाए के उदिम करे जात हे।
वनमंडलाधिकारी अउ प्रबंध संचालक, कोरिया वनमंडल बैकुण्ठपुर प्रभाकर खलको ह कहिन कि विभाग के लच्छ वन आश्रित परिवार मन ला सिरिफ आर्थिक मदद देना नोहे, भलकुन ओमन ला शिक्षा, सुरक्षा अउ सम्मानजनक जीवन उपलब्ध कराना घलो हे। वन विभाग के जम्मो योजना आज हजारो परिवार मन के जिनगी म सकारात्मक बदलाव लावत हे।
तेन्दूपत्ता संग्रहण बनिस कमई के मुख्य जरिया
शासन कोती ले बछर 2026 बर तेन्दूपत्ता संग्रहण के दर 5.50 रूपया प्रति गड्डी तय करे गे हे। एखर मुताबिक 100 गड्डी म 550 रूपया अउ प्रति मानक बोरा 5550 रूपया के भुगतान करे जाही। एखर से वन इलाका म रहवईया हजारों परिवार मन ला रोजगार अउ आर्थिक सहारा मिलत हे।
लघु वनोपज के समर्थन मूल्य ले आर्थिक मजबूती
न्यूनतम समर्थन मूल्य योजना कोती ले साल बीज, महुआ, इमली, कोदो, माहुल पत्ता के संगे-संग अलग-अलग लघु वनोपज मन के तय दर म खरीदी करे जात हे। एखर ले वन आश्रित परिवार मन ला उंखर उपज के उचित दाम मिलत हे अउ बिचौलिया मन म निर्भरता कम होगे हे।
बीमा योजना मन ले मिलत हे सामाजिक सुरक्षा
राजमोहनी देवी बीमा योजना के कोती ले तेन्दूपत्ता संग्राहक परिवार मन ला बीमा सुरक्षा दे जात हे। सामान्य मौत, दुर्घटना ले मौत अउ विकलांगता के स्थिति म सहायता राशि प्रदान करे जाथे। एखर ले जरूरत के बखत परिवार मन ला आर्थिक सहारा मिलथे। एखर अलावा समूह बीमा योजना के तहत परिवार के अउ सदस्य मन ला घलो सहायता राशि के लाभ दे जात हे। ए योजना आर्थिक रूप ले कमजोर परिवार मन बर राहत के जरिया बनत हे।
लइका मन के पढ़ई-लिखई बर छात्रवृत्ति
तेन्दूपत्ता संग्राहक परिवार के लइका मन ला शिक्षा बर छात्रवृत्ति अउ प्रोत्साहन राशि दे जात हे। कक्षा 10वीं अउ 12वीं म बढ़िया नंबर लवइया नोनी-बाबू मन ला प्रोत्साहन राशि प्रदान करे जाथे। व्यावसायिक अउ गैर- व्यवसायिक कोर्स म पढ़इया विद्यार्थी मन ला घलो आर्थिक सहायता मिलत हे। प्रतिभाशाली विद्यार्थी मन बर ‘विशेष शिक्षा प्रोत्साहन योजना’ घलो चलत हे, जेखर से लइका मन ला आघू बढ़े के मौका मिलत हे।
चरण पादुका योजना ले राहत
वनांचल म बुता करइया तेन्दूपत्ता संग्राहक मन ला हर बछर चरण पादुका घलो प्रदान करे जाथे, ताकि उमन ला बुता करे के बखत सुविधा मिल सके।
करोड़ों रूपिया के सहायता राशि के भुगतान
राजमोहनी देवी बीमा योजना कोती ले जिला म अप्रैल 2024 ले अक्टूबर 2025 तक 33 हितग्राही मन ला 34 लाख 70 हजार रुपिया के सहायता राशि दे गे हे। अउ समूह बीमा योजना के तहत 18 प्रकरण म 2 लाख 16 हजार रुपिया के भुगतान करे गे हे। छात्रवृत्ति योजना कोती ले घलो विद्यार्थी मन ला सीधा उंखर बैंक खाता म राशि प्रदान करे गे हे।
