बस्तर म मध्य क्षेत्रीय परिषद के 26वीं बैठक: अमित शाह ह कहिन- बस्तर अब नक्सलमुक्त अउ विवादमुक्त
जगदलपुर. केन्द्रीय गृह अउ सहकारिता मंत्री अमित शाह ह आज जगदलपुर म ‘मध्य क्षेत्रीय परिषद’ के 26वीं बैठक के अध्यक्षता करिन। ए बैठक म छत्तीसगढ़ के मुख्यमंत्री विष्णु देव साय, मध्य प्रदेश के मुख्यमंत्री डॉ. मोहन यादव, उत्तर प्रदेश के मुख्यमंत्री योगी आदित्यनाथ अउ उत्तराखंड के मुख्यमंत्री पुष्कर सिंह धामी ह घलो संघरिन।
बैठक के मुख्य बिंदु अउ अमित शाह के संबोधन:
- बस्तर अब नक्सलमुक्त अउ विवादमुक्त: गृह मंत्री ह कहिन कि ए बड़े खुसी के बात हे कि बस्तर म बैठक होवत हे अउ बैठक ले पहिलीच बस्तर ह नक्सलमुक्त हो गे हे। उमन एला एक बड़े उपलब्धि बतात कहिन कि ए क्षेत्र अब सिर्फ नक्सलमुक्त नइ, भलकुन ‘विवादमुक्त’ घलो हो गे हे। अब केंद्र अउ राज्य के बीच कऊनो विवाद नइ बचे हे।
- विकास के नवा लच्छ: श्री शाह ह कहिन कि नक्सलवाद के खतमा के बाद अब हमर लड़ाई ‘बिकास’ बर हे। जब तक ए इलाका के लोगन ला देश के बाकी विकसित क्षेत्र मन के बराबर नइ ले आबो, तब तक हमर लड़ाई चालू रहिही।
- ‘होल ऑफ द गवर्नमेंट’ अप्रोच: केंद्र अउ राज्य सरकार मन मिल के बस्तर म बिकास के काम ला गति दे हे। ए बैठक म 2004 ले 2014 के तुलना म क्षेत्रीय परिषद के बैठक मन म तिगुना बाढ़त अउ चर्चा करे गे मुद्दा मन म 200% से जादा के बाढ़त दर्ज करे गे हे।
- बिकास के रोडमैप:
- कुपोषण के खिलाफ लड़ाई: सबो मुख्यमंत्री मन ला कुपोषण मिटाए बर कंधे ले कंधा मिला के काम करे के आहवान करे गे हे।
- शिक्षा अउ स्वास्थ्य: स्कूल ड्रॉपआउट दर कम करे, स्कूलों के गुणवत्ता सुधार अउ मिलावटखोरी रोके बर कड़ा निर्देस दे गे हे।
- न्याय म तेजी: बलात्कार अउ POCSO केस मन म समय ले DNA जांच करे के निर्देस दे गे हे ताकि दोसी मन ला जल्दी सजी मिल सके। अदालती मामला मन ला निपटाए बर हाई कोर्ट ला बिसेस अदालत (Special Courts) बनाय के आग्रह करे गे हे।
- साइबर सुरक्षा: साइबर अपराध ला रोके बर 1930 हेल्पलाईन नंबर ला केंद्र के तर्ज म अपडेट करे के निर्देस दे गे हे।
- नवा न्याय संहिता: उमन कहिन कि देश म लागू तीनो नवा न्याय संहिता मन के अमल बहुत अच्छा होवत हे। उंकर लक्ष्य हे कि 2029 ले पहिली एइसन व्यवस्था बनाय जाय कि हर आपराधिक मामला के निपटारा सुप्रीम कोर्ट तक 3 साल के भीतर हो जाय।
गृह मंत्री के संदेश: अमित शाह ह कहिन कि प्रधानमंत्री मोदी जी के नेतृत्व म संघीय ढांचा मजबूत हो गे हे। उमन छत्तीसगढ़ सरकार के तारीफ करत कहिन कि नक्सलवाद के खिलाफ लड़ाई म मुख्यमंत्री अउ उपमुख्यमंत्री के नेतृत्व बहुत असरदार रहिस, जेकर नतीजा आज बस्तर के शांति म दिखत हे।
ए बैठक म विकास के मॉनिटरिंग, जल जीवन मिशन-2, वित्तीय समावेशन अउ बिजली सुधार जइसन मुद्दा मन म गंभीर चर्चा करे गे हे। गृह मंत्री ह सबो राज्य मन ला आगाह करे हे कि कम ले कम 50% ध्यान ग्रामीण बिकास अउ व्यक्ति ला मजबूत बनाइया योजना मन म देवत रहंय।
