जनजातीय गरिमा उत्सव: अंतिम छोर के गांव तक पहुँचिस सरकारी योजना मन के लाभ

स्वास्थ्य शिविर अउ ‘एक पेड़ माँ के नाम’ अभियान म उमड़िस जनसैलाब

रायपुर. छत्तीसगढ़ म जनजातीय गौरव अउ जनभागीदारी ला नवा विस्तार देवत ‘जनभागीदारी अभियान अउ जनजातीय गरिमा उत्सव 2026’ के तहत अब दूरस्थ अंचल मन म विकास के बयार बहना सुरू हो गे हे। प्रदेश के जनजातीय बहुल अउ दुर्गम गांव मन म आज व्यापक स्तर म संतृप्ति शिविर, स्वास्थ्य परीक्षण अउ वृक्षारोपण अभियान के आयोजन करे गे हे। शासन के योजना मन ला हर ग्रामीण तक पहुँचाए के ए महाअभियान म दाई-दीदी, युवा अउ बुढ़वा मन ह बढ़-चढ़ के हिस्सा लिन।

गांव मन म मुफ्त इलाज अउ आयुष्मान कार्ड के सौगात

अंचल म आयोजित बिसेस स्वास्थ्य शिविर मन म ग्रामीण मन के भारी भीड़ उमड़िस। डॉक्टर मन के टीम ह ग्रामीण मन के स्वास्थ्य परीक्षण करके बीपी अउ सुगर जइसन जांच करिन, भलकुन जरूरतमंद मरीज मन ला मौका म ही निःशुल्क दवाई घलो बांटे गे हे। शिविर के सबले बड़े खासियत ए रहिस कि ओहां ‘आयुष्मान भारत कार्ड’ बनाय अउ ओला अपडेट करे के ऑन-स्पॉट सुबिधा दे गे हे, जेखर से गरीब परिवार मन ला सीधा स्वास्थ्य सुरक्षा के कवच मिल गे हे। चिकित्सा दल ह ग्रामीण मन ला मौसमी बीमारी ले बचे, स्वच्छता बनाय रखे अउ सही पोषण के जानकारी घलो दीन।

“सबसे दूर, सबसे पहिली”

शासन के एही सोच के संग जिला के ओ गांव मन ला प्राथमिकता दे जात हे जऊन भौगोलिक रूप ले सबले दूर हें। प्रशासन के लच्छ 25 मई तक हर पात्र व्यक्ति ला सत-प्रतिशत लाभ पहुँचाए के हे।

‘एक पेड़ माँ के नाम’ के ले गे संकल्प

उत्सव के बखत सिरिफ स्वास्थ्य ही नोहे, भलकुन प्रकृति ला सहेजे के घलो बड़का संदेश दे गे हे। प्रधानमंत्री के आह्वान म “एक पेड़ माँ के नाम” अभियान के तहत गांव मन म सामूहिक रूप ले पौधारोपण करे गे हे। ए भावुक अउ पर्यावरण-हितैषी मुहिम म स्थानीय जनप्रतिनिधि, सरपंच-सचिव, आंगनबाड़ी कार्यकर्ता, मितानिन अउ अलग-अलग बिभाग के शासकीय कर्मचारी मन ह ग्रामीण मन के संग मिल के पौधा लगाइन। खास बात ए रहिस कि सिरिफ पौधा रोपे ही नोहे, भलकुन ओखर नियमित देखभाल अउ संरक्षण के सामूहिक संकल्प घलो ले गे हे।

25 मई तक चलही महाअभियान, प्रशासन के अपील

जिला प्रशासन के वरिष्ठ अधिकारी मन बताइन कि मुख्यमंत्री के मंशा के अनुरूप जिला के सबो ग्राम मन म आबइया 25 मई तक लगातार संतृप्ति शिविर के आयोजन करे जाही। ए शिविर मन के मुख्य लच्छ ए सुनिश्चित करना हे कि कोनो घलो पात्र व्यक्ति सरकारी योजना के लाभ ले वंचित झन रहे। जिला प्रशासन ह आम जनता ले अपील करे हे कि उमन ए शिविर मन म जादा ले जादा संख्या म पहुँच के सिरिफ अपन अधिकार अउ योजना के लाभ ही झन उठांय, भलकुन ए जनभागीदारी अभियान ला एक जन-आंदोलन के रूप दे के सफल बनांय।