लोक निर्माण विभाग के सचिव ह बनत हवय कयाघाट ब्रिज अउ मरीन ड्राइव के करिन निरीक्षण
विभागीय अधिकारी मन के बैठक लेके सड़क अउ भवन निर्माण बूता के करिन समीक्षा
रायपुर. लोक निर्माण विभाग के सचिव मुकेश कुमार बंसल ह आज रायगढ़ म केलो नदी म बनत हवय कयाघाट ब्रिज अउ मरीन ड्राइव के निरीक्षण करिन। ओमन कलेक्टर मयंक चतुर्वेदी अउ विभागीय अधिकारी मन ले दूनों बूता के प्रगति के जानकारी लीन अउ जरूरी निर्देश दीन। ओमन पूरा गुणवत्ता के संग बूता म तेजी लावत ए दूनों महत्वाकांक्षी परियोजना मन ला समय-सीमा म पूरा करे बर कहिन।
लोक निर्माण विभाग के सचिव ह रायगढ़ सर्किट हाउस म विभागीय अधिकारी मन के बैठक लेके जिला म चलत सड़क अउ भवन निर्माण बूता के समीक्षा घलो करिन। ओमन जम्मो निर्माण बूता के पूरा उपयोगिता (Functionality) अउ टिकाऊपन (Sustainability) पक्का करे के निर्देश दीन। ओमन जम्मो बूता म गुणवत्ता अउ समय-सीमा ला सबले पहिली प्राथमिकता देबे बर कहिन।
बंसल ह रायगढ़ जिला म लोक निर्माण विभाग के जम्मो उप संभाग मन म चलत सड़क अउ पुल मन के समीक्षा के बाद नवा भवन मन के बूता के समीक्षा करिन। ओमन ट्रांजिट हॉस्टल, मेडिकल कॉलेज अस्पताल भवन, प्रयास आवासीय स्कूल भवन, कामकाजी महिला छात्रावास अउ स्पोर्ट्स कॉम्प्लेक्स के निर्माण के कार्ययोजना मन के जानकारी लेके तुरते काम सुरू करे बर कहिन।
रायगढ़ के कलेक्टर मयंक चतुर्वेदी, जिला पंचायत के सीईओ अभिजीत बबन पठारे, लोक निर्माण विभाग के प्रमुख अभियंता वी.के. भतपहरी, बिलासपुर परिक्षेत्र के मुख्य अभियंता आर.के. रात्रे अउ जी.एस. मंडावी, अधीक्षण अभियंता के.पी. संत, एन.के. लाल अउ जे.पी. तिग्गा संग कार्यपालन अभियंता अउ जम्मो अनुविभागीय अधिकारी घलो बैठक म मौजूद रहिन।
