पर्यटन के माध्यम ले नवा पहिचान गढ़ही छत्तीसगढ़ : मुख्यमंत्री विष्णुदेव साय
- छत्तीसगढ़ के असली सुंदरता अउ सांस्कृतिक संपन्नता ला दुनिया के आगू लाना हमर उद्देश्य: मुख्यमंत्री विष्णुदेव साय
- हॉस्पिटैलिटी सेक्टर म निवेश ले युवा मन बर रोजगार के नवा बेरा बनही: मुख्यमंत्री
- मुख्यमंत्री विष्णुदेव साय के पहल ले पर्यटन अउ हॉस्पिटैलिटी सेक्टर म निवेश ला मिलत हे नवा गति
- 500 करोड़ रुपिया ले जादा निवेश के संग छत्तीसगढ़ के पर्यटन क्षेत्र म नवा सम्भावना: हॉस्पिटैलिटी सेक्टर म निवेश ला लेके इंडियन होटल्स कंपनी लिमिटेड ह देखाइस रूचि
रायपुर. मुख्यमंत्री विष्णुदेव साय के अगुवाई म छत्तीसगढ़ अब देश के पर्यटन नक्शा म अपन नवा पहिचान गढ़े के रस्ता म तेजी ले आगू बढ़त हे। पर्यटन ला उद्योग के दरजा मिले, निवेश के बढ़िया नीति अउ राज्य सरकार के पक्का इच्छाशक्ति के कारन प्रदेश म पर्यटन अउ हॉस्पिटैलिटी सेक्टर म निवेश के सम्भावना लगातार मजबूत होवत हे। ए कड़ी म मुख्यमंत्री विष्णुदेव साय ह आज अपन निवास कार्यालय म पर्यटन ला बढ़ावा दे, पर्यटक सुविधा मन के विकास अउ विस्तार करे तथा हॉस्पिटैलिटी सेक्टर म निवेश ला लेके रखे गे बड़े बैठक म सामिल होइन। बैठक म देश के नामी इंडियन होटल्स कंपनी लिमिटेड के प्रतिनिधि मन संग सरकार के बड़े अधिकारी मन मौजूद रहिन।
मुख्यमंत्री विष्णुदेव साय ह बैठक म कहिन कि छत्तीसगढ़ ह उत्तर ले दच्छिन तक कुदरती धरोहर के अनमोल धरती आय, जिहां नदिया, पहाड़, घना जंगल, झरना (जलप्रपात), संपन्न आदिवासी संस्कृति अउ जनजातीय परंपरा मन छत्तीसगढ़ ला एक अलग पहिचान देथें।
मुख्यमंत्री साय ह कहिन कि राज्य सरकार के उददेस्य दुनिया ला छत्तीसगढ़ के असली सुंदरता, सांस्कृतिक संपन्नता अउ कुदरती विविधता ले पहिचान कराना आय। ओमन कहिन कि पर्यटन ला उद्योग के दरजा देय ले हॉस्पिटैलिटी सेक्टर म निवेश के सम्भावना तेजी ले बढ़े हे अउ सैलानी मन बर बढ़िया रहे के ठउर, परिवहन अउ आधुनिक सुविधा मन के विकास करके छत्तीसगढ़ ला सुग्घर पर्यटन ठउर बनाए जा सकत हे।
मुख्यमंत्री विष्णुदेव साय ह कहिन कि राज म लगातार निवेश के प्रताव मिलत हें अउ ए सिलसिला म इंडियन होटल्स कंपनी लिमिटेड ह छत्तीसगढ़ म निवेश करे के इच्छा जताए हे, जो प्रदेश के पर्यटन क्षेत्र बर अब्बड़ जरूरी साबित होही। ओमन कहिन कि ए रकम के निवेश ले पर्यटन के बुनियादी ढांचा मजबूत होही अउ इहां के स्थानीय युवा मन बर रोजगार अउ स्वरोजगार के नवा बेरा तैयार होही।
बैठक के बेरा म इंडियन होटल्स कंपनी लिमिटेड के प्रतिनिधि मन ह मुख्यमंत्री विष्णुदेव साय के आगू अपन निवेश प्रताव के जरूरी गोठ मन ला बताइन अउ कहिन कि कंपनी ह छत्तीसगढ़ म हॉस्पिटैलिटी सेक्टर म लगभग 500 करोड़ रुपिया ले जादा निवेश के योजना म बूता करत हे, जेला जल्दी आगू बढ़ाए जाही। कंपनी के प्रतिनिधि मन कहिन कि ए निवेश ले प्रदेश म पर्यटन के बुनियादी ढांचा ला मजबूती मिलही अउ रोजगार के नवा बेरा के जनम होही।
वित्त मंत्री ओ पी चौधरी ह कहिन कि राज्य सरकार ह निवेश बर बढ़िया माहौल तैयार करे हे अउ जम्मो जरूरी अनुमति के प्रक्रिया ला सरल, पारदर्शी अउ तय बेरा म पूरा होइया बनाए हे।
बैठक म ए घलो बताए गिस कि पर्यटन ला उद्योग के दरजा मिले के बाद हॉस्पिटैलिटी सेक्टर म निवेश के रस्ता बड़े रूप म खुले हे। राज्य सरकार ह पर्यटन क्षेत्र ला आधुनिक ढांचा, बड़े सुभीता अउ निवेश प्रोत्साहन नीति के माध्यम ले आगू बढ़ाए के संकलप लेके खास पहल करत हे। प्रदेश के बढ़िया मानसूनी स्थिति, संपन्न प्राकृतिक धन अउ निवेश के बढ़िया नीति ह पर्यटन विकास बर मजबूत अधार तैयार करत हे।
बैठक म उद्योग विभाग के अधिकारी मन ह निवेश प्रोत्साहन नीति अउ मिलेवइया छूट के पूरा जानकारी देवत कहिन कि यदि कोई निवेशक 500 करोड़ रुपिया ले जादा के निवेश करथे या 1000 ले जादा लोगन मन ला रोजगार के बेरा देथे, त ओला ‘बी-स्पोक पॉलिसी’ के तहत अलग ले बढ़ावा अउ खास लाभ दिए जाही। संग म पर्यटन ला बढ़ाए बर बुनियादी ढांचा, सड़क संपरक, रहे के सुभीता अउ पर्यटक सेवा मन ला मजबूत करे म खास ध्यान दिए जात हे।
बैठक म छत्तीसगढ़ पर्यटन मंडल के अध्यक्ष नीलू शर्मा, मुख्य सचिव विकास शील, मुख्यमंत्री के प्रमुख सचिव सुबोध कुमार सिंह, वित्त सचिव डॉ. रोहित यादव, निवेश आयुक्त ऋतु सेन, मुख्यमंत्री के सचिव राहुल भगत, उद्योग सचिव रजत कुमार, पर्यटन विभाग के सचिव डॉ. एस. भारतीदासन संग दूसर बड़े अधिकारी मन मौजूद रहिन।
हमर चैनल ला सब्सक्राइब करव अऊ मया देवव
Whatsapp –https://whatsapp.com/channel/0029VaPmGTXInlqS2WQAhw1n
YouTube –https://youtube.com/@jayjohar?si=AZDI5zciOCT3Oqhw
Facebook –https://www.facebook.com/share/18GsFBTgfd/
