आस्था, स्वाभिमान अउ संस्कृति के सुग्घर संगम: सोमनाथ स्वाभिमान पर्व म गूँजिस ‘हर-हर महादेव’

’ज्वालेश्वर महादेव मंदिर म भजन संध्या ह बांधिस समां, हजारों श्रद्धालु होईन सामिल’

रायपुर. अटूट आस्था, सनातन संस्कृति अउ देस के मान-सम्मान के चिनहा ‘सोमनाथ स्वाभिमान पर्व’ के 1000 बछर पूरा होय के खुसी म गौरेला-पेंड्रा-मरवाही जिला प्रसासन कोती ले विकासखंड गौरेला के तवाडबरा म स्थित ज्वालेश्वर महादेव मंदिर म सोमार के दिन एक बड़े भजन संध्या अउ धार्मिक कार्यक्रम करे गीस। ए कार्यक्रम म विधायक प्रणव कुमार मरपच्ची, जिला पंचायत अध्यक्ष समीरा पैकरा, जिला पंचायत उपाध्यक्ष राजा उपेन्द्र बहादुर सिंह समेत कतकोन जनप्रतिनिधि अउ भारी संख्या म श्रद्धालु उपस्थित रहिन।

विधायक अउ कलेक्टर ह ज्वालेश्वर महादेव ले जिला के मनखे मन बर सुख, सांति अउ खुशहाली के असीस मांगिन। मंदिर म उमड़े श्रद्धालु भीड़ ह पूरा माहौल ला आध्यात्मिक उर्जा अउ भक्ति ले भर दीस। सोमनाथ स्वाभिमान पर्व ला भारत के सनातन परंपरा, सांस्कृतिक चेतना अउ आत्मगौरव के प्रतीक माने जाथे। उही भावना ला धियान म रखत ए भजन संध्या म भक्ति अउ देसभक्ति के सुग्घर मेल देखिस।

नामी भजन गायक साजन पाठक, मीनाक्षी केशवानी अउ कीर्ति कुसरो ह शिव भक्ति ले भरे भजन के अइसन प्रस्तुति दीन कि जम्मो श्रद्धालु मगन हो गीन। देर रात तक चले ए भक्ति संगीत म भक्त झूमत रहिन अउ पूरा मंदिर परिसर “हर-हर महादेव” के जयकारा ले गूँजत रहिस।

ए मौका म गौरेला-पेंड्रा-मरवाही के कलेक्टर डॉ. संतोष कुमार देवांगन ह सोमनाथ मंदिर के गौरवसाली इतिहास, सनातन संस्कृति के मजबूती अउ भारतीय सभ्यता के अखंडता ऊपर गोठ बात करिन। ओमन कहिन कि सोमनाथ स्वाभिमान पर्व सिरिप एक ठन धार्मिक आयोजन नोहे, बल्कि ये हमर सांस्कृतिक विरासत, आस्था अउ राष्ट्रीय स्वाभिमान के जागत-जोत प्रतीक ए। ओमन आगू कहिन कि अइसन कार्यक्रम ले समाज म धार्मिक चेतना, सामाजिक समरसता अउ सांस्कृतिक एकता अउ जादा मजबूत होथे।

कार्यक्रम के बखत श्रद्धालु म भारी उत्साह देखिस। भक्ति, संस्कृति अउ समाजिक एकता के संदेस ले भरे ये आयोजन छेत्र के लोगन मन बर एक यादगार आध्यात्मिक अनुभव बन गे।