वैस्विक संकट के बीच डामर के दूसर रस्ता निकालव, सुधारव सड़क के दसा: उद्योग मंत्री लखनलाल देवांगन
उद्योग मंत्री लखनलाल देवांगन ह नगर निगम के बूता के करिन समीक्छा
रायपुर, वाणिज्य, उद्योग, सार्बजनिक उपक्रम, आबकारी अउ स्रम मंत्री लखनलाल देवांगन ह आज अधिकारी ला दिसा-निदेस देवत हुये कहिन हे कि मिडिल ईस्ट एशिया में लड़ाई के सेती बने परिस्थिति के कारन डामर नइ मिल पावत हे। एकरे सेती सड़क मन के डामरीकरन के बूता सुरू नइ हो पावत हे, जबकि पइसा मंजूर करके टेंडर आदि के कारवाही अब्बड़ पहिली ले पूरी कर ली गय हे। एकर बर उच्च स्तर ऊपर गोठ-बात करके दूसर रस्ता निकालव अउ सड़क के दसा ला सुधारव।
ओमन अधिकारी से कहिन कि बरसात ले पहिली नाला अउ नाली के निरमान बूता ला जरूरी रूप से पूरा कराव, बिकास के बूता मन ला तेजी लाव अउ जउन निरमान एजेंसी काम में लापरवाही दिखावत हें, ओमन के खिलाफ कड़ी कारवाही करव, ओमन ला ब्लैकलिस्ट करव।
ए सब निदेस उद्योग मंत्री लखनलाल देवांगन ह आज कोरबा में रखे गय बिकास बूता के समीक्छा बइठक के बखत अधिकारी ला दिइन। मंत्री श्री देवांगन ह आज नगर पालिक निगम कोरबा के कोसाबाड़ी, पं. रविशंकर नगर अउ बालको जोन के अधिकारी अउ वार्ड पारसद मन के बइठक लेके ए तीनों जोन के 28 वार्ड के बिकास बूता के वार्डवार समीक्छा करिन। बइठक में महापौर संजूदेवी राजपूत, आयुक्त आशुतोष पाण्डेय, सभापति नूतन सिंह ठाकुर, बरिष्ठ पारसद नरेन्द्र देवांगन, अशोक चावलानी संग दूसर वार्ड पारसद घलो हाजिर रहिन।
बरसात के आयू-आयू अउ सड़क के डामरीकरन काम नइ हो पाये ला गंभीरता से लेवत हुये उद्योग मंत्री श्री देवांगन ह अधिकारी ला निदेस देत कहिन कि बरसात आये में अब जादा दिन नइ हे, निगम छेत्र के जम्मो बड़े सड़क के डामरीकरन के मंजूरी अब्बड़ पहिली मिल चुके हे, टेंडर के कारवाही घलो पूरी हो चुके हे, काम के आदेस घलो दे दिय गय हे, भचल मिडिल ईस्ट एशिया में लड़ाई के कारन जम्मो जघा डामर के कमी बने हुए हे। जेकर सेती कोरबा में घलो सड़क के डामरीकरन के काम रूके हे। ओमन अधिकारी ला रस्ता देखावत कहिन कि ओमन उच्च स्तर ऊपर गोठ-बात करंय अउ दूसर रस्ता निकालके सहर के सड़क ला सुधारंय ताकि आहु क बरसात में सहर के रहइया ला आवइ-जावइ में कोनो दुख-तकलीफ झन होय।
सुरू नइ होय बिकास बूता के वार्डवार समीक्छा करत हुये उद्योग मंत्री श्री देवांगन ह अधिकारी ला कड़ा निदेस दिइन कि संबंधित निरमान एजेंसी ला नोटिस देवव अउ काम ला जल्दी सुरू कराव। वइसने च चलत हुये बिकास बूता मन के समीक्छा के बखत ए बात आगू आइस कि कुछु काम बीच में रूके हुए हे, ए बात ऊपर उद्योग मंत्री श्री देवांगन ह कड़ा रुख अपनावत अधिकारी मन ला निदेस दिइन कि ओमन संबंधित निरमान एजेंसी ला काम सुरू करे के नोटिस देवंय, फेर घलो यदि ओमन काम सुरू नइ करंय त ओमन के जमा अमानत रासि ला जब्त करत हुये ओमन ला ब्लैकलिस्ट करे के कारवाही करव।
उद्योग मंत्री श्री देवांगन ह अधिकारी से कहिन कि बिकास अउ निरमान बूता के होवत बखत संबंधित इंजीनियर काम के बराबर देख-रेख करंय, गुनवत्ता ऊपर बिसेस धयान देवंय अउ ए बात ला पक्का करंय कि बिकास काम पूरी गुनवत्ता के साथ होवय अउ काम में आत सामान तय मानक के हिसाब से होवय।
वार्डवार समीक्छा करिन, काम में तेजी लाये के दिइन निदेस
बइठक के बखत उद्योग मंत्री श्री देवांगन ह कोसाबाड़ी, पं. रविशंकर शुक्ल नगर अउ बालको जोन के वार्ड में अलग-अलग मद मन, जैसे—जिला खनिज न्यास मद (DMFT), अधोसंरचना, वित्त आयोग मद, मध्यक्षेत्र आदिवासी विकास प्राधिकरण, राजस्व व आपदा प्रबंधन, प्रभारी मंत्री मद, विधायक मद, सी.एस.आर. मद, महापौर मद, पारसद निधि, निगम मद संग दूसर कतको मद के तहत करे जावइया सी.सी. रोड निरमान, नाली निरमान, सामुदायिक भवन, सार्बजनिक शेड मंच, स्कूल भवन, आंगनबाड़ी, किचन शेड, अहाता व बाउण्ड्रीवाल, टायलेट निरमान, उप स्वास्थ्य केन्द्र के सुधार, अउ कमरा के निरमान, चबूतरा, सांस्कृतिक मंच निरमान, कलवर्ट (पुलिया), मुक्तिधाम, घाट पचरी निरमान, तरीया गहिरकरन, कांजी हाउस के जीर्नोध्दार, यात्री प्रतीक्षालय, पीये के पानी के ब्यवस्था से जुड़े काम अउ बिजली बिस्तार व स्ट्रीट लाईट से जुड़े काम मन के तेजी के वार्डवार समीक्छा करिन अउ काम ला बेगानी पूरा करे के निदेस दिइन।
पीये के पानी अउ स्ट्रीट लाईट से जुड़े काम मन के समीक्छा
बइठक में उद्योग मंत्री श्री देवांगन ह पीये के पानी के सप्लाय ब्यवस्था अउ स्ट्रीट लाईट से जुड़े काम के समीक्छा करिन। ओमन अधिकारी ला निदेस देवत कहिन कि जम्मो वार्ड अउ बस्ती में पीये के पानी के सप्लाय बिना कोनो रुकावट के अउ तय समे में करे जाय। बिजली के खराबी, पाईप लाईन के टूट-फूट या कोनो दूसर कारन से कोनो वार्ड या बस्ती में पानी के सप्लाय रुकथे, त तुरंते टैंकर के माधियम से ओ जघा पानी पहुंचाय जाय ताकि ए बढ़त गरमी में उहां के नागरिक मन ला पानी के तकलीफ झन होय। उद्योग मंत्री श्री देवांगन ह निगम डहर ले लगाय जावत नवा स्ट्रीट लाईट के काम ला तेज करे अउ जिन वार्ड में स्ट्रीट लाईट लगाय जावत हे, ओ जम्मो वार्ड में एक साथ काम करे के निदेस घलो अधिकारी ला दिइन।
साफ-सफाई के काम में अउ जादा कसावट लावव
उद्योग मंत्री लखनलाल देवांगन ह बइठक में ए तीनों जोन के 28 वार्ड मन के साफ-सफाई ब्यवस्था अउ करे जावत सफाई काम के समीक्छा करिन अउ स्वास्थ्य अधिकारी ला निदेस दिइन कि साफ-सफाई के काम में अउ जादा कसावट (सख्ती) लावव। ओमन कहिन कि पाछू बछर के स्वच्छ सर्वेक्षण में हमर कोरबा ह स्वच्छता रैंकिंग में देस में 8वां स्थान पाइश रहाय, हम सब ला मिलके ए दिसा में अउ जादा मिहनत करे बर परही ताकि हमर कोरबा देस में नंबर-1 ऊपर आय अउ छत्तीसगढ़ राज व ऊर्जानगरी कोरबा के नाव बाढ़े।
समीक्छा बइठक में दिये गय निदेस के कड़ाई से पालन करव
ए मौका ऊपर महापौर संजूदेवी राजपूत ह निगम के अधिकारी मन ला निदेस देवत कहिन कि समीक्छा बइठक के बखत जउन भी निदेस दिये जावत हे, ओकर कड़ाई से पालन करना पक्का करव। ओमन कहिन कि निगम के बिकास अउ निरमान काम, नागरिक सेवा अउ सुबिधा से जुड़े काम में तेजी के संग-संग आम लोगन मन के समस्या अउ सिकायत मन ऊपर बिसेस रूप से धयान देवव अउ मिले सिकायत मन के समे-सीमा में निरकरण करावव।
ए बखत पारसद अउ एम.आई.सी. सदस्य हितानंद अग्रवाल, चन्द्रलोक सिंह, अजय गोंड़, चन्द्रकली जायसवाल, ममता यादव, पंकज देवांगन, राकेश वर्मा, प्रताप सिंह कंवर, धनकुमारी गर्ग, अब्दुल रहमान, सुनीता चौहान, वर्षा दिनेश वैष्णव, सिमरनजीत कौर, सत्येन्द्र दुबे, सीमा कंवर, चंदा देवी, चेतन सिंह मैत्री, मंगलराम बंदे, तरुण सिंह राठौर, रजत खुंटे, अपर आयुक्त विनय मिश्रा, अधीक्षण अभियंता सुरेश बरूआ, जोन कमिश्नर भूषण उरांव, पवन वर्मा, एन.के. नाथ, स्वास्थ्य अधिकारी डॉ. संजय तिवारी, निगम सचिव रामेश्वर सिंह कंवर आदि के संग दूसर लोगन मन घलो हाजिर रहिन।
