समाज के सहभागिता ले होही सिक्षा के अनूकुल वातावरन….डॉ महंत

जांजगीर-चांपा। छत्तीसगढ़ विधानसभा अध्यक्ष डॉ चरणदास महंत के मुख्य आतिथ्य म चांपा के सासकीय मयूरध्वज महादानी राजा स्नातकोत्तर महावि़द्यालय म वार्षिक उत्सव के आयोजन होइस।

विधानसभा अध्यक्ष ह कार्यक्रम ल संबोधित करत कहिन के समाज के हर वर्ग के सहाभागिता ले ही शिक्षन संस्था मन म अध्ययन के अनुकूल वातावरन तइयार करे जा सकत हे। समाज म सिक्षा संस्था मन के महत्वपूरन भूमिका हे। उमन कहिन के सासकीय अउ सार्वजनिक संपत्ति संसाधन मन ल संरक्षित करना जनप्रतिनिधि मन अउ आम नागरिक मन के जिम्मेदारी हे।

ए अवसर म छात्र-छात्रा मन ह सरस्वती वंदना, स्वागत गीत संग रंगा-रंग सांस्कृतिक कार्यक्रम प्रस्तुत करिन। कार्यक्रम म जिला पंचायत अध्यक्ष नंदकिशोर हरवंश, छात्रसंघ के पहिली पदाधिकारी मनहरण राठौर, मदनलाल अग्रवाल संग प्राध्यापक, छात्र-छात्रा अउ अभिभावक उपस्थित रहिन।