बीजापुर ल वन मंत्री ह 36 करोड़ रुपया के दिस विकास कार्य के सौगात, कहिन- छत्तीसगढ़ के विकास ल मिलीस नवा रफ्तार
रायपुर। वन अउ जलवायु परिवर्तन अउ बीजापुर जिला के प्रभारी मंत्री केदार कश्यप अपने दु दिवसीय प्रवास के दौरान शुक्रवार के मिनी स्टेडियम म आयोजित आमसभा म शामिल होइन। ए अवसर म ओमन ह बीजापुर जिला के विकास बर 36 करोड़ 41 लाख रुपया के सौगात दिस, जेमा 32 करोड़ 26 लाख रूपया के कार्य के भूमिपूजन अउ 4 करोड़ 15 लाख रूपया के लागत वाला कार्ये के लोकार्पण शामिल हे।
मंत्री कश्यप ह कहिन कि मुख्यमंत्री विष्णुदेव साय के नेतृत्व म राज्य सरकार ह प्रधानमंत्री नरेन्द्र मोदी के गारंटी ल पूरा करत छत्तीसगढ़ म विकास के रफ्तार तेज करे हे। सरकार ह सुशासन के एक बछर म ही दूरदराज के क्षेत्र म बिजली, सड़क, पानी, स्कूल अउ अस्पताल जइसन बुनियादी सुविधा पहुंचाए हे। नियद नेल्ला नार योजना के अंतर्गत बस्तर के सुदूरवर्ती क्षेत्र म विकास के गाथा लिखे जात हे। ओमन ह बताइन कि मुख्यमंत्री साय ह 18 लाख प्रधानमंत्री आवास स्वीकृत करके गरीब मन के पक्के घर के सपना ल साकार करिन हे। किसान मन बर 3,100 रुपया प्रति क्विंटल के दर ले धान खरीदी अउ लंबित बोनस के भुगतान करिन हे। उहें तेन्दूपत्ता संग्राहक मन ल 5,500 रुपया प्रति मानक बोरा के दर ले खरीदी करके वनवासी मन के आय म वृद्धि करिन हे। कार्यक्रम ल सांसद महेश कश्यप ह घलो सम्बोधित करिन अउ कहिन कि छत्तीसगढ़ सरकार जम्मों वर्ग के विकास बर काम करत हे।
कार्यक्रम के दौरान केदार कश्यप ह विभिन्न योजना के तहत हितग्राही मन ल लाभान्वित करिन। ओमन ह पूर्ण आवास प्राप्त हितग्राही मन ल प्रतीकात्मक चाबी सौंपिंन, जबकि नवा आवास बर स्वीकृति पत्र बांटिस। स्व-सहायता समूह ल 75 हजार अउ 3 लाख रुपया के चेक दिस, एखऱ संग वन अधिकार पत्र, जाति प्रमाण पत्र, आयुष्मान कार्ड अउ अन्य योजना के लाभ घलो वितरित करे गिस।
ए अवसर म कलेक्टर संबित मिश्रा, एसपी डॉ. जितेंद्र यादव, डीएफओ रंगानाथा रामाकृष्णा वाय, अउ अन्य प्रशासनिक अधिकारी मौजुद रहिन। जनप्रतिनिधी मन म बी. पुष्पा राव, घासीराम नाग, गोपाल पवार अउ कई वरिष्ठ नागरिक उपस्थित रिहीन।
