योजना मन के नावं बदले ल लेके सदन गरमाइस..

रायपुर : भाजपा शासनकाल के दउरान जारी योजनामन के नावं बदले  के मामला म आज सदन म विपक्ष ह जोरशोर ले उठात हुए हंगामा करिन अउ स्थगन के मांग करे लगिन।

शून्यकाल के दउरान भाजपा विधायक मन ह योजना मन के नावं ल बदले ल ले के सत्ता पक्ष ले जवाब मांगिस। संगेच ए मामला म स्थगन कर चर्चा के घलो मांग करिन। विपक्ष के ए सवाल म त्वरित जवाब घलो सरकार के ओर ले देय गिस।

शून्यकाल म भाजपा विधायक नारायण चंदेल ह दीनदयाल के नावं म संचालित योजना मन के नाम बदले जाए ल लेके ऐतराज जताइस। चंदेल के संग अजय चंद्राकर, शिवरतन शर्मा, बृजमोहन अग्रवाल अउ नेता प्रतिपक्ष धरमलाल कौशिक ह घलो दिस। अजय चंद्राकर ह ए दउरान कहिन,कोनो महापुरुष के विचारधारा व उंखर नावं म संचालित योजना मन ल बदला जाना अलोकतांत्रिक हे।

जवाब म नगरीय प्रशासन मंत्री शिव डहरिया ह कहिन, नावं बदले के सुरुआत भाजपा ह करिस हे। इंदिरा, राजीव गांधी के नाम म जे योजना चलत रहिस हे, ओला बदला देय रहिस हे।  उमन कहिन, प्रजातंत्र के दुहाई देवइया मन ह खुद ल देखना चाही, उमन का करिन हे?

मोहन मरकाम ह कहिन, यूपीए ह राजीव गांधी विद्युतीकरण के नावं म जे राशि देय रहिस हे, ओला बीजेपी सरकार दीनदयाल विद्युतीकरन योजना बनाके संचालित करिस हे।

शिवरतन शर्मा ह कहिन, अगर योजना मन के नावं बदल के कोनो महापुरुष के नावं म करे जातीस त ऐतराज नइ रहिस हे, लेकिन कोनो महापुरुष के नावं म संचालित योजना मन ल  बदलना पूरी तरह ले अलोकतांत्रिक हे। उमन ए परंपरा ल देस बर गलत बताइस।

नेता प्रतिपक्ष कौशिक ह कहिन, योजना मन के नाम रातों-रात बदल के सरकार ह दूषित मानसिकता के परिचय देय हे।  उमन एला महापुरुष मन के अपमान बताइस हे।