स्वास्थ्य ले समृद्धि के मंत्र ले ही आघु बढ़त हे छत्तीसगढ़ के विकास यात्रा – मुख्यमंत्री साय
रायपुर। हमर राज्य अपन स्थापना के रजत जयंती वर्ष मनात हे। हमन विकसित छत्तीसगढ़ के कोती कदम बढ़ा चुके हवन। छत्तीसगढ़ के विकास यात्रा स्वास्थ्य ले समृद्धि के मंत्र ले आघु बढ़त हे। आज छत्तीसगढ़ मेडिकल टूरिज्म के बड़ा केंद्र बनगे हे। एक समय रहिन जब कतको गंभीर बीमारी के उपचार बर लोगन मन दिल्ली-मुंबई जावय। आज गंभीर ले गंभीर बीमारी के उपचार रायपुर शहर के सेवाभावी डॉक्टर करत हें। हार्ट अउ किडनी ट्रांसप्लांट ले लेके कैंसर जइसन बीमारी के अत्याधुनिक तकनीक ले उपचार रायपुर के अस्पताल म होवत हे। मुख्यमंत्री विष्णुदेव साय ह आज इंडियन मेडिकल एसोसिएशन के शपथ ग्रहण समारोह के बेर ए बात कहिन।
मुख्यमंत्री साय ह कहिन कि राज्य सरकार नागरिक मन ल बेहतर ले बेहतर चिकित्सा सुविधा उपलब्ध कराए बर हर संभव प्रयास करत हे। प्राथमिक स्वास्थ्य केंद्र ले लेके जिला अस्पताल म चिकित्सा व्यवस्था ल मजबूत करे बर बेहतर संसाधन, आवश्यक अधोसंरचना विकसित उपलब्ध करे के संग- संग डॉक्टर अउ चिकित्सा स्टाफ के भर्ती करे जात हे। हमर सरकार ह राज्य म स्वास्थ्य सुविधा के विस्तार बर आयुष्मान भारत प्रधानमंत्री जन आरोग्य योजना के संग शहीद वीरनारायण सिंह स्वास्थ्य योजना लागू करिन हे। आयुष्मान योजना के तहत गरीब परिवार अउ 70 वर्ष ले अधिक आयु के जम्मों वर्ग के नागरिक मन ल पांच लाख रुपया तक के निःशुल्क इलाज अउ एपीएल परिवार मन ल 50 हजार रुपया तक के निःशुल्क इलाज के सुविधा देय जात हे। एखर अलावा जटिल रोग के इलाज बर मुख्यमंत्री सहायता कोष ले घलो सहायता देय जात हे।
मुख्यमंत्री साय ह कहिन कि छत्तीसगढ़ म 10 शासकीय अउ 4 निजी मेडिकल कालेज सहित कुल 14 मेडिकल कॉलेज हें। राज्य म चार नवा मेडिकल कॉलेज के भवन के निर्माण करे जात हे। जांजगीर चांपा, कबीरधाम, मनेंद्रगढ़ अउ गीदम म मेडिकल कॉलेज बने ले स्वास्थ्य सेवा के विस्तार होहि। विदेश ले घलो बड़का संख्या म लोगन मन इलाज बर छत्तीसगढ़ आवत हें। ए हमर बर गर्व के बात हे। ओमन ह कहिन कि आईएमए जइसन संगठन चिकित्सक के आवाज़ बने के संग डॉक्टर अउ मरीज के बीच संबंध ल अउ मजबूत बनाए म अहम भूमिका निभा सकत हें।
स्वास्थ्य मंत्री श्याम बिहारी जायसवाल ह कार्यक्रम ल संबोधित करत कहिन कि छत्तीसगढ़ म स्वास्थ्य सेवा ल सुगम अउ सुदृढ़ बनाए के काम करे जात हे। चिकित्सकगण के सहयोग अउ समर्पण ले ही हमन चिकित्सा के क्षेत्र म छत्तीसगढ़ ल नवा मुकाम म ले जाए म सफल होहि। ओमन ह कहिन कि राज्य के मेडिकल कॉलेज म चिकित्सा सुविधा ल बेहतर बनाए बर सरकार ह वित्तीय अधिकार म वृद्धि करिन हे। चिकित्सा सेवा अउ चिकित्सा शिक्षा के क्षेत्र म राज्य के उपलब्धी म विस्तार ले प्रकाश डालत कहिन कि सिकलसेल के स्क्रीनिंग म छत्तीसगढ़ देश के अग्रणी राज्य हे। इहां एक करोड़ 29 लाख लोगन मन के स्क्रीनिंग करे गे हे। राज्य म सिकल सेल अनुसंधान संस्थान के स्थापना अउ बोन मेरो ट्रांसप्लांट के सुविधा शुरू होहि। एखर बर 48 करोड़ रूपया के स्वीकृति दे गे हे। ओमन आईएमए रायपुर ल विश्वास दिलायिन कि सरकार चिकित्सक अउ जनहित के काम म हरसंभव सहयोग प्रदान करहि। कार्यक्रम ल पूर्व विधायक डॉ. विमल चोपड़ा ह घलो संबोधित करिन।
