cm भूपेश बघेल ह काली बीजापुर म 328 करोड़ रुपया के अलग-अलग विकास कार्य के करही लोकार्पण अऊ भूमिपूजन

जय जोहार…. सीएम (cm) भूपेश बघेल ह काली रविवार के बीजापुर जिला म 328 करोड़ रुपया के अलग-अलग विकास कार्य के लोकार्पण अऊ भूमिपूजन करही। एमा 241 करोड़ 75 लाख रुपया के लागत ले 72 विकास कार्य के भूमिपूजन अऊ 86 करोड़ 74 लाख रुपया के लागत के 54 विकास कार्य के लोकार्पण शामिल हे।

ए अवसर म सीएम (cm) बघेल ह बीजापुर म स्वामी आत्मानंद इंग्लिश माध्यम स्कूल के लोकार्पण करही। उहचे महादेव तालाब, लोहा डोंगरी पार्क अऊ शहरी गौठान, बीजपुर के अवलोकन करही। एखर संगेसंग सीएम बघेल ह अलग-अलग संगठन के पदाधिकारी, समाज प्रमुख, जनप्रतिनिधि अऊ युवा ले मुलाकात कर चर्चा करही।

सीएम (cm) बघेल ह दूरस्थ इलाका ल गांव ले जोड़े बर 37 करोड़ 92 लाख रुपया ले बेदरे-लंका रद्दा म इंद्रावती नदी पर उच्च स्तीरय पुल निर्माण, पिनकोण्डा तालनार मार्ग म मरी नदी म 11 करोड़ के लागत ले पुल निर्माण कार्य के भूमिपूजन करही।

संगेसंग कोएनार-एरमनार ले तोयनार सड़क निर्माण, 5 करोड़ 96 लाख रुपया के लागत ले टिकलेर रेड्‌डी सीमेंट कांक्रीट सड़क निर्माण, 34 करोड़ 13 लाख रुपया के लागत ले 15 ग्रामीण सड़क के निर्माण, 37 करोड़ 9 लाख रुपया के लागत ले भोपालपटनम-तारलागुड़ा डामरीकृत सड़क निर्माण, 1 करोड़ 75 लाख रुपया के लागत ले गुड़साकाल स्टामडेम निर्माण कार्य के घलो भूमिपूजन करही।