Raipur : सीएम ह करीन छत्तीसगढ़ी पत्रिका ‘अरई तुतारी’ अउ गीत संग्रह ‘चंदन अस मोर गांव के माटी’ के विमोचन

जय जोहार । (Raipur) मुख्यमंत्री भूपेश बघेल ह छत्तीसगढ़ी राजभाषा दिवस म अपन निवास कार्यालय म छत्तीसगढ़ी मासिक पत्रिका ‘अरई तुतारी’ अउ छत्तीसगढ़ी गीत संग्रह ‘चंदन अस मोर गांव के माटी’ के विमोचन करीन ।

मासिक पत्रिका ‘अरई तुतारी’ के सम्पादकीय टीम के सदस्य मन ह मुख्यमंत्री ल बताइन कि ‘अरई तुतारी’ छत्तीसगढ़ी भाखा के पहिली मासिक पत्रिका हे। एमा छत्तीसगढ़ के संस्कृति के विविध आयाम तिहार, लोकनृत्य, पर्यटन स्थल, सिनेमा, साहित्य आदि ले जुड़े आलेख के संग्रह छत्तीसगढ़ी भाखा म करे गेहे ।

छत्तीसगढ़ी गीत संग्रह ‘चंदन अस मोर गांव के माटी’ के गीतकार चम्पेश्वर गोस्वामी ह मुख्यमंत्री ल बताइन कि ए संग्रह के माध्यम ले वो हा छत्तीसगढ़ी भाखा म लिखे अपन 72 गीत ल किताब के शक्ल दीन हे ।

मुख्यमंत्री ह छत्तीसगढ़ी पत्रिका ‘अरई तुतारी’के सम्पादकीय टीम अउ गीत संग्रह ‘चंदन अस मोर गांव के माटी’ के गीतकार चम्पेश्वर गोस्वामी ल बधाई अउ सुभकामना दीन। ए अवसर म ओमप्रकाश चन्द्राकर, अभिषेक दुबे, अवधेश मल्लिक उपस्थित रिहीन ।