मुख्यमंत्री ह आंगनबाड़ी कार्यकर्ता अउ सहायिका मन ल लिखिस चिट्‌ठी, किहिस आपमन के सेवा अनमोल, तुहंर बिना हमर छत्तीसगढ़ महतारी ला कुपोषण मुक्त नई कर सकन

रायपुर। मुख्यमंत्री श्री भूपेश बघेल ह आंगनवाड़ी कार्यकर्ता अउ सहायिका मन ला चिट्ठी लिखके कुपोषण दूर करे मं उंकर योगदान के सराहना करे हे। श्री बघेल ह लिखे हे कि आपमन के सेवा अनमोल हे, एला कोनो किसिम ले तउले नी जा सके। तभो ले मोर सरकार ह आपमन ला सम्मानजनक प्रतिफल मिलय, तेखर बर प्रयास करत हे। इही पाय के आप के मानदेय म 1 जुलाई 2019 से बढ़ोतरी कर दे गे हे। आपमन ले बस अतका उम्मीद हे कि नोनी-महतारी मन के शिक्षा, स्वास्थ्य अउ विकास बर अइसने मन लगा के सेवा करत राहव।
मख्यमंत्री ह अपन पत्र म लिखें हें कि ” मैं जानत हौं कि तुमन गांव गंवतरी मा रहिके हमर माईलोगिन अउ लईकस मन के देखभाल ल करत हव। तुहंर मन के प्रयास से हमर गांव के तस्वीर बदलत हे। लईका मन ह स्वास्थ्य व शिक्षित होवत हे अउ माईलोगिन मन के सामाजिक स्तर में सुधार होवत हे। तुहंर मन के मेहनत से हमर छत्तीसगढ़ हा बहुत जल्दी अग्रणी राज्य हो जही, जिहां लईका मन में कुपोषण के समस्या खतम हो जाही। मैं तुंहर मेहनत ला देख के अभिभूत हौं।”
मुख्यमंत्री श्री बघेल ह अपन पत्र म आगे केहे हें कि ” तुंहर मन के मेहनत ला कोनो पईया रूपया से नई तौले जा सकै। तभो ले मोर सरकार हा प्रयास करत हे कि तुमन ला सम्मानजनक प्रतिफल प्राप्त होवय। अभी 1 जुलाई, 2019 से तुंहर मन के मानदेय में बढ़ोत्तरी करे हंव। एकर बाद भी मोर सरकार तुहंर मन के कठिनाई ला दूर करे के प्रयास करत रईही।”
मुख्यमंत्री श्री बघेल ह अपन पत्र म आगे अउ ये केहे हें कि ” आप सब बहिनी मन मोर सरकार के एक अंग हव। तुहंर मन के प्रयास ले गांव के तस्वीर हा बदलत हे। बलरामपुर ल सुकमा जिला तक लईका मन में कुपोषण अउ बीमारी के रोकथाम बर तुमन के सहयोग लागही, तुहंर बिना हमर छत्तीसगढ़ महतारी ला कुपोषण मुक्त नई कर सकन। मोर निवेदन हे कि तुमन छत्तीसगढ़ मा सुपोषण के अलख जगावव अउ ये छत्तीसगढ़ महतारी के लईका मन ला स्वस्थ व सुपोषित बनावव। मैं तुहंर मन के उज्ज्वल भविष्य के कामना करत हंव। जय जोहार, जय छत्तीसगढ़।