चुनावी फंड जुटाए बर जियादा कीमत शराब बेचत हे कांग्रेस सरकार

भाजपा विधायक शिवरतन शर्मा ह लगाइस आरोप
रायपुर. चुनावी फंड जुटाए बर ए प्रदेस के कांग्रेस सरकार तय कीमत ले जियाद दर म शराब बेचत हवय. एखर जरिया हर महीना 180 ले 200 करोड़ रुपिया के अवैध कमाई करे जात हे. ये आरोप भाजपा के विधायक शिवरतन शर्मा ह लगाइस हे.

विधायक शर्मा ह बताइन, प्रदेस म शराब के 650 दुकान संचालित होवत रहीस हे. जिहां बेचे जात शराब म एमआरपी ले 10 ले 20 रुपिया जियादा ले जात हवय. एक शराब दुकान के अवैध कलेक्शन एक लाख रुपया ले ऊपर हे. ये तरह ले प्रदेस म 650 दुकान मन के लिहाज ले हर दिन छह करोड़ रुपया के अवैध कलेक्शन करे जात हे.

शर्मा ह बताइस के, 70 रुपिया म मिलइया गोवा क्वार्टर ये दिन मन म 180 रुपिया म मिलत हवय. उहें 80 रुपिया के प्लेन शराब 200 रुपिया म बेचे जात हे. ये ही नई हाई रेंज शराब ब्लैक म बेचे जात हवय. विधायक ह कहिन के, सरकार ह नियम बनाये हे के एक व्यक्ति ल 4 ले जियादा बॉटल नइ दे जात हवय. लेकिन कोची मन ल पेटी देय जात हवय. हर गांव म कोचिया अवैध शराब बेचत हवय.