पूछताछ बर बुलाए युवक के लाश पांच घंटा बाद फांसी म लटके मिलिस..

अंबिकापुर. चोरी के मामला म पूछताछ बर बुलाए गे एक युवक के लाश ह पांच घंटा बाद फांसी म लटके मिलिस। इतवार के दिन पुलिस ह रात म 8 बजे पूछताछ बर पंकज कुमार बेक ल बुलाए रिहिस। देर रात 1:30 बजे साइबर सेल के तीर म प्राइवेट अस्पताल कैंपस म युवक संदिग्ध अवस्था म फांसी म लटके पाए गिस।

आईजी केसी अग्रवाल ह टीआई के संग 5 पुलिस वाला मन ल निलंबित कर दे हे। एखर जांच बर सरगुजा एसपी ल घलो निर्देश दे गे हे। मृतक सूरजपुर जिला के भटगांव थाना के सलका अघिना गांव के रहने वाला रिहिस। घटनास्थल म ओखर पैर ह जमीन ले घुटना के बल टिके मिलिस। उहें ओखर लाश म सिरिफ अंडरवियर रहिस अऊ चोट के घलो निशान पाए गे हे। उहें पुलिस ह बतावत हे कि पूछताछ के दरी ओहा शौच करे के बहाना म बाहर निकलिस अऊ चकमा देके फरार होए के बाद फांसी लगा लिस।

ऐ कोती परिजन म आरोप लगावत हे कि पुलिस कस्टडी ले फरार होके युवक ह कईसे फांसी लगा सकत हे। पुलिस के प्रतिवेदन म न्यायिक मजिस्ट्रेट के उपस्थिति म पंचनामा कर शव के पोस्टमार्टम कराए गिस। परिजन मन कहत हे कि युवक के कोनों आपराधिक रिकार्ड नई हे। ओखर खिलाफ चोरी के कथित मामला म पुलिस ह पहिली बार अपराध ल दर्ज करे हे। परिजन मन ह पुलिस की कस्टडी म युवक के मउत होए के आशंका जतावत हे।

दूसर कोती मामला म भाजपा नेता म परिजन संग शव ल बनारस रोड म रखके चक्काजाम कर दिन। ओमन दोषी पुलिस वाला मन उपर कार्रवाई के संगे-संग युवक के परिवार ल 50 लाख रुपिया मुआवजा के मांग करत रिहिन। एखर सती बनारस रोड के यातायात ढाई घंटा प्रभावित रिहिस। प्रशासन कोती ले सहायता राशि के रूप म 50 हजार रुपिया दे गिन जेखर बाद ओमन चक्काजाम ल खतम करिन।