रायपुर. ये साल एक अगस्त के आने वाला हरेली तिहार ह छत्तीसगढ़िया कलेवर अउ छत्तीसगढ़ी रंग ले सजा-संवरा नजर आही। काबर कि राज्य शासन ह जिहां हरेली तिहार बर सार्वजनिक अवकाश के घोषना करे हे। ये तिहार ल ‘‘हरेली तिहार‘‘ के माध्यम ले छत्तीसगढ़ी संस्कृति के संरक्षण अउ संवर्धन के उद्देश्य से घलो राज्य म मनाए के निर्णय ले गे हे।

मुख्यमंत्री भूपेश बघेल, कृषि मंत्री रविन्द्र चौबे अउ संस्कृति मंत्री अमरजीत भगत ये संबंध म विभिन्न विभाग के अधिकारी मन ल निरदेशित करिन हे कि ये साल सबो जिला मुख्यालय, विकासखण्ड मुख्यालय अउ ग्राम पंचायत म एला ‘‘हरेली तिहार‘‘ के नाम से आयोजित करे जाए।

ये कार्यक्रम म मुख्यमंत्री समेत मंत्रीगण अन्य अन्य अतिथि घलो शामिल होही। एखर माध्यम ले संझाकन छत्तीसगढ़ के ग्रामीण खेलकूद गेड़ी दौड़, छत्तीसगढ़ी सांस्कृतिक कार्यक्रम अउ अन्य प्रतियोगिता के आयोजन करे जाहि। छत्तीसगढ़ी पकवान के  स्टॉल लगही अउ खेलकूद स्पर्धा म पुरस्कार के संगे-संग प्रतीकात्मक पौधारोपण ल प्राथमिकता दिही। इही तरह ले गांव-गांव म नवनिर्मित दईहान के लोकार्पण घलो करे जाहि।

राज्य शासन ह हरेली तिहार मनाए बर पंचायत अउ ग्रामीण विकास, कृषि, पशुधन विभाग, संस्कृति अउ जनसम्पर्क विभाग के भागीदारी सुनिश्चित करे गिन हे। एखर बर पंचायत अउ ग्रामीण विकास विभाग ल नोडल विभाग बनाए गे हे।