राहौद म पीडीएस बितरन म गड़बड़ी

जांजगीर-चांपा। जिला के राहौद नगर पंचायत के पीडीएस बितरन म गड़बड़ी के सिकायत के मामला म जांच सुरु हो गिस हे। पामगढ़ खाद्य निरीक्षक ह जब सोसायटी म खाद्यान्न बितरन के भौतिक सत्यापन करिस त स्टॉक म 353 बोरा चाउर, 7 बोरा शक्कर अऊ 68 बोरा नून कम पाए गिस। खाद्य निरीक्षक ह जांच के बाद पंचनामा बनाइस। जांच म मरे अऊ पलायन करे मनखे मनके नाव म रासन बितरन होए के खुलासा घलो आघु आइस हे। ये घलो आरोप हे कि सोसायटी के बिक्रेता ह पीडीएस के सामान बितरन करे के बजाय चौकीदार ल समाग्री बितरन के जिम्मा दे हे। पाछु के छह महीना ले ये सब चलत हे,अऊ संचालक मंडल ल एकर कउनो जानकारी नइ हे।